रत्नागिरीत अतिवृष्टीमुळे पूरपरिस्थिती; पोलीस प्रशासनाकडून नागरिकांना सतर्कतेचे आवाहन
सुरक्षिततेचे नियम पाळण्याचे पोलीस अधीक्षक नितीन बगाटे यांचे आवाहन
पूर आणि अतिवृष्टीच्या संकटात पोलीस दल नागरिकांच्या पाठीशी
रत्नागिरी, दि. ६ (प्रतिनिधी) :- रत्नागिरी जिल्ह्यात गेल्या काही दिवसांपासून सुरू असलेल्या संततधार आणि मुसळधार अतिवृष्टीमुळे अनेक भागांमध्ये गंभीर पूरपरिस्थिती निर्माण झाली आहे. नद्यांनी धोक्याची पातळी ओलांडली असून सखल भागांमध्ये मोठ्या प्रमाणावर पाणी साचल्याने जनजीवन विस्कळीत झाले आहे. या पार्श्वभूमीवर रत्नागिरी जिल्हा पोलीस दलाच्या वतीने नागरिकांच्या सुरक्षिततेसाठी अत्यंत महत्त्वाचे आवाहन करण्यात आले आहे. रत्नागिरीचे पोलीस अधीक्षक मा. श्री. नितीन बगाटे (भा.पो.से.) यांनी जिल्ह्यातील सद्यस्थितीचा आढावा घेत नागरिकांना कोणत्याही प्रकारची जीवाची जोखीम न पत्करता जिल्हा व पोलीस प्रशासनाने दिलेल्या सूचनांचे काटेकोरपणे आणि गांभीर्याने पालन करण्याचे निर्देश दिले आहेत. हवामान विभागाने दिलेल्या इशाऱ्याचा संदर्भ घेत पोलीस प्रशासनाने संपूर्ण जिल्ह्यात सुरक्षा व्यवस्था अधिक कडक केली असून आपत्कालीन परिस्थितीचा सामना करण्यासाठी पोलीस यंत्रणा सज्ज असल्याचे त्यांनी स्पष्ट केले आहे.
सध्या उद्भवलेल्या पूरपरिस्थितीचा विचार करता नागरिकांनी अत्यंत सतर्क राहणे गरजेचे असून, विशेषतः पूर आलेले रस्ते, पाण्याखाली गेलेले पूल किंवा वेगवान प्रवाह असलेले ओढे व नाले पार करण्याचा कोणताही धाडसी प्रयत्न करू नये, असे आवाहन पोलिसांकडून करण्यात आले आहे. अनेकदा पाण्याचा अंदाज न आल्यामुळे दुर्घटना घडण्याची शक्यता असते, त्यामुळे वाहने संथ गतीने चालवावीत आणि शक्यतो वाहत्या पाण्यात वाहने घालणे पूर्णपणे टाळावे. या कालावधीत अनेक नागरिक व पर्यटक नदी, धरण, धबधबे तसेच समुद्रकिनारी पर्यटन किंवा सेल्फी काढण्यासाठी गर्दी करतात, परंतु सध्याची परिस्थिती अत्यंत धोकादायक असल्याने अशा पर्यटन स्थळांवर जाण्यास प्रशासनाने पूर्णपणे बंदी घातली आहे. नागरिकांनी स्वतःचा आणि आपल्या कुटुंबाचा जीव धोक्यात घालू नये आणि जबाबदार नागरिक म्हणून प्रशासनाला पूर्ण सहकार्य करावे.
अतिवृष्टीच्या काळात सोशल मीडियाच्या माध्यमातून विविध प्रकारच्या अफवा पसरण्याची मोठी शक्यता असते. यामुळे नागरिकांमध्ये भीतीचे वातावरण निर्माण होते. हे टाळण्यासाठी कोणत्याही अप्रमाणित किंवा अनधिकृत माहितीवर विश्वास ठेवू नये आणि अशी कोणतीही माहिती किंवा संदेश पुढे फॉरवर्ड करू नये, असे आवाहन पोलीस अधीक्षकांनी केले आहे. हवामान विभागाच्या आणि स्थानिक प्रशासनाच्या अधिकृत सूत्रांकडून मिळणाऱ्या माहितीचीच शहानिशा करून त्यावर विश्वास ठेवावा. ज्या नागरिकांच्या घरात पूरपरिस्थितीमुळे पाणी शिरण्याची शक्यता आहे किंवा जे सखल भागात राहत आहेत, त्यांनी तातडीने प्रशासनाच्या मदतीने सुरक्षित व उंच ठिकाणी स्थलांतर करावे. सुरक्षित ठिकाणी जात असताना घरातील विद्युत पुरवठा बंद करण्याची खबरदारी घ्यावी जेणेकरून शॉर्ट सर्किटसारखे अपघात टाळता येतील. तसेच घरातील लहान मुले, वृद्ध नागरिक, ज्येष्ठ व्यक्ती आणि दिव्यांग बांधव यांची विशेष काळजी घ्यावी आणि त्यांना सर्वप्रथम सुरक्षित स्थळी हलवावे.
आपत्कालीन परिस्थितीचा सामना करण्यासाठी नागरिकांनी आपल्या मोबाईल फोनची बॅटरी पूर्ण चार्ज करून ठेवावी, तसेच घरात टॉर्च, आवश्यक औषधे आणि आपत्कालीन कीट तयार ठेवावे. पूरग्रस्त भागात अडकलेल्या नागरिकांनी अजिबात न घाबरता, शांत राहून मदत पथकाची वाट पाहावी आणि बचाव पथकाकडून मिळणाऱ्या सूचनांचे विनाकारण गर्दी न करता पालन करावे. कोणत्याही प्रकारच्या तातडीच्या मदतीसाठी किंवा आपत्कालीन संकट समयी रत्नागिरी पोलीस दलाने नागरिकांसाठी २४ तास कार्यरत असणारी हेल्पलाईन उपलब्ध करून दिली आहे. नागरिक तात्काळ 'डायल ११२' (Dial 112) या क्रमांकावर फोन करून मदत मागू शकतात, अथवा प्रशासनाने सुरू केलेल्या 'रत्नसेतु चॅटबॉट' (RATNASETU CHATBOT) च्या ९३७१४१५६१२ या व्हॉट्सॲप क्रमांकावर संपर्क साधून अचूक ठिकाणाची माहिती देऊन तात्काळ मदत मिळवू शकतात, असे आवाहन रत्नागिरी जिल्हा पोलीस दलातर्फे करण्यात आले आहे.
Comments
Post a Comment