झोप येत असल्यास वाहन थांबवून विश्रांती घ्या; रत्नागिरी पोलिसांचे वाहनचालकांना सुरक्षित प्रवासाचे आवाहन
डुलकी ठरेल जीवघेणी! 'काही मिनिटांची विश्रांती, आयुष्यभराचा आनंद जपू शकते' - रत्नागिरी पोलिसांचा मोलाचा संदेश
रत्नागिरी, दि. २ जुलै (प्रतिनिधी) :- रस्त्यावरील वाढते अपघात आणि त्यामध्ये जाणारे निष्पाप जीव वाचवण्यासाठी रत्नागिरी पोलीस प्रशासनाकडून सातत्याने विविध उपक्रम आणि जनजागृती मोहीम राबवली जात आहे. याच पार्श्वभूमीवर रत्नागिरी पोलिसांनी आपल्या अधिकृत फेसबुक पेजवरून वाहनचालकांसाठी अत्यंत महत्त्वाचा आणि डोळे उघडणारा संदेश दिला आहे. "काही मिनिटांची विश्रांती, आयुष्यभराचा आनंद जपू शकते. झोप येत असल्यास वाहन थांबवा, विश्रांती घ्या आणि त्यानंतरच प्रवास करा," अशा आशयाची पोस्ट शेअर करत पोलिसांनी नागरिकांना सुरक्षित प्रवासाचे आवाहन केले आहे.
रत्नागिरीचे पोलीस अधीक्षक नितीन बगाटे (भा.पो.से.) यांच्या मार्गदर्शनाखाली रत्नागिरी पोलीस आणि 'ऑपरेशन टेप' (TAPE) यांच्या संयुक्त विद्यमाने ही रस्ता सुरक्षा मोहीम अधिक प्रभावीपणे राबवली जात आहे. पोलिसांनी सोशल मिडीयावर प्रसिद्ध केलेल्या संदेशातून दोन मार्ग दाखवण्यात आले आहेत. एक मार्ग सुरक्षितपणे घराकडे घेऊन जाणारा आहे, तर दुसरा चुकीचा मार्ग थेट रुग्णालयाच्या आपत्कालीन विभागाकडे (इमर्जन्सी) घेऊन जाणारा आहे. वाहन चालवताना येणारी झोप किंवा थकवा हा सुरक्षित घराऐवजी रुग्णालयाच्या दारात पोहोचवू शकतो, हा गंभीर इशारा या चित्रातून अत्यंत प्रभावीपणे मांडण्यात आला आहे. अनेकदा रात्रीच्या किंवा पहाटेच्या वेळी वाहनचालकांना डुलकी लागते आणि अवघ्या काही सेकंदांची ही चूक संपूर्ण कुटुंबाला आयुष्यभराचे दुःख देऊन जाते. हीच बाब अधोरेखित करत पोलिसांनी वाहनचालकांना प्रवासादरम्यान सतर्क राहण्याचे आवाहन केले आहे.
सुरक्षित प्रवासासाठी रत्नागिरी पोलिसांनी या मोहिमेत काही महत्त्वाचे नियम पाळण्यास सांगितले आहे. प्रवासादरम्यान थकवा आणि झोप हे चालकाचे सर्वात मोठे शत्रू असतात, त्यामुळे सलग प्रवास करणे टाळावे. दर दोन तासांच्या प्रवासानंतर किमान १० ते १५ मिनिटांची विश्रांती घ्यावी, जेणेकरून शरीराला आणि डोळ्यांना आराम मिळेल. याशिवाय, वाहनाचा वेग मर्यादित ठेवून त्यावर पूर्ण नियंत्रण ठेवणे, प्रवासादरम्यान सीट बेल्टचा आवर्जून वापर करणे आणि गाडी चालवताना मोबाईलचा वापर पूर्णपणे टाळणे अत्यंत गरजेचे आहे. केवळ काही मिनिटांचा आळस किंवा घाई चित्र बदलू शकते, त्यामुळे स्वतःचा आणि इतरांचा जीव धोक्यात न घालता, डोळ्यांवर झापड येत असल्यास तात्काळ वाहन बाजूला थांबवून विश्रांती घ्यावी आणि त्यानंतरच सुरक्षितपणे पुढील प्रवास करावा, असा मोलाचा संदेश रत्नागिरी पोलिसांनी दिला आहे. पोलिसांच्या या सतर्कतेचे आणि अनोख्या जनजागृतीचे नागरिकांमधून कौतुक होत आहे.
Comments
Post a Comment