खोपोलीतील श्री विरेश्वर मंदिर चोरी प्रकरणाचा रायगड पोलिसांकडून पर्दाफाश!
४ आरोपींसह ४३.६१ लाखांचा सर्व मुद्देमाल हस्तगत
खोपोली-रायगड, दि. २६ (प्रतिनिधी) :- रायगड जिल्ह्यातील खोपोली येथील ऐतिहासिक आणि प्रसिद्ध श्री विरेश्वर मंदिरात काही दिवसांपूर्वी झालेल्या मोठ्या चोरीच्या घटनेने संपूर्ण जिल्ह्यात खळबळ उडाली होती. अज्ञात चोरट्यांनी मंदिराचे कुलूप तोडून आत प्रवेश करत देवस्थानचे तब्बल ४३ लाख ६१ हजार रुपये किमतीचे मौल्यवान चांदीचे दागिने आणि वस्तू लंपास केल्या होत्या. श्रद्धेच्या ठिकाणी झालेल्या या धाडसी चोरीमुळे स्थानिक नागरिकांसह भाविकांमध्ये तीव्र संतापाची लाट पसरली होती. या घटनेचे गांभीर्य लक्षात घेऊन रायगड पोलीस दलाने तातडीने तपासाची चक्रे वेगाने फिरवली.
वरिष्ठ पोलीस अधिकाऱ्यांच्या मार्गदर्शनाखाली पोलिसांची विशेष पथके स्थापन करून या प्रकरणाचा सखोल तपास सुरू करण्यात आला. तपासादरम्यान पोलिसांनी मंदिर परिसरातील तसेच शहरातील विविध भागांतील सीसीटीव्ही फुटेजची कसून पाहणी केली. त्याचबरोबर आपल्या गोपनीय माहितीदारांचे जाळे सक्रिय करून आणि तांत्रिक विश्लेषणाचा (ट्रेडिशनल आणि टेक्निकल इंटेलिजन्स) प्रभावी वापर करून संशयितांचा माग काढण्यास सुरुवात केली.
पोलिसांनी अवघ्या काही दिवसांच्या अथक प्रयत्नांनंतर आणि कौशल्याने रचलेल्या सापळ्यात या गुन्ह्यातील मुख्य चारही आरोपींना जेरबंद करण्यात यश मिळवले. अटकेत असलेल्या आरोपींची कसून चौकशी केली असता, त्यांनी विरेश्वर मंदिरातील चोरीच्या गुन्ह्याची कबुली दिली. इतकेच नव्हे तर, रायगड पोलिसांनी आरोपींकडून चोरीस गेलेला ४३ लाख ६१ हजार रुपयांचा संपूर्ण चांदीचा मुद्देमाल सुखरूप हस्तगत केला आहे.
धार्मिक स्थळावर झालेला हा गंभीर गुन्हा अतिशय कमी वेळात उघडकीस आणून, चोरीला गेलेला संपूर्ण ऐवज पुन्हा मिळवून दिल्याबद्दल रायगड पोलिसांच्या या दमदार आणि कौतुकास्पद कारवाईचे खोपोलीतील नागरिक, श्री विरेश्वर मंदिर ट्रस्ट आणि संपूर्ण जिल्ह्यातून मोठ्या प्रमाणावर कौतुक केले जात आहे.
Comments
Post a Comment