रायगडच्या महिला पोलीस रेश्मा डफळ यांची राष्ट्रीय पातळीवर ऐतिहासिक कामगिरी!
NSG च्या अत्यंत कठीण कोर्समध्ये पटकावला पाचवा क्रमांक
पोलीस अधीक्षक आँचल दलाल यांच्याकडून कौतुक व शुभेच्छा
अलिबाग-रायगड, दि. २० (विशेष प्रतिनिधी) :- रायगड पोलीस दलाच्या शिरपेचात आणखी एक मानाचा तुरा रोवला गेला असून, रायगड पोलीस दलातील बॉम्बशोधक व नाशक पथकात (BDDS) कार्यरत असलेल्या महिला पोलीस श्रीमती रेश्मा सुदाम डफळ यांनी राष्ट्रीय स्तरावर अद्वितीय कामगिरी बजावली आहे. हरियाणा येथील मानेसर येथे नॅशनल सिक्युरिटी गार्ड (NSG) द्वारे आयोजित करण्यात आलेल्या अत्यंत खडतर आणि आव्हानात्मक अशा ४५ दिवसांच्या विशेष प्रशिक्षण कोर्समध्ये त्यांनी हे घवघवीत यश संपादन केले. या आंतरराष्ट्रीय स्तरावरील प्रशिक्षण अभ्यासक्रमामध्ये जगभरातील एकूण ४६ देशांतील नामांकित आणि उच्चपदस्थ सुरक्षा अधिकाऱ्यांनी सहभाग घेतला होता. या अत्यंत प्रतिष्ठेच्या आणि कठीण समजल्या जाणाऱ्या कोर्समध्ये संपूर्ण महाराष्ट्र राज्यातून सहभागी होण्याचा बहुमान मिळवणाऱ्या श्रीमती रेश्मा डफळ या एकमेव महिला अधिकारी ठरल्या आहेत.
मानेसर येथील एनएसजीच्या प्रशिक्षण केंद्रात पार पडलेल्या या कोर्समध्ये सहभागी अधिकाऱ्यांच्या कौशल्याची आणि क्षमतेची अत्यंत कठीण परीक्षा घेण्यात आली. आधुनिक तंत्रज्ञान आणि आव्हानात्मक परिस्थितीला तोंड देण्याच्या उद्देशाने या प्रशिक्षणात आर्टिफिशियल इंटेलिजन्स (AI) आधारित ग्रेडिंग सिस्टीमचा वापर करण्यात आला होता. या अत्याधुनिक आणि पारदर्शक एआय ग्रेडिंग प्रणालीमध्ये श्रीमती रेश्मा डफळ यांनी आपल्या अफाट बुद्धिमत्तेची, शारीरिक क्षमतेची आणि उत्कृष्ट रणकौशल्याची प्रचिती देत संपूर्ण कोर्समध्ये अव्वल कामगिरी केली. त्यांनी या कठीण चाचण्यांमध्ये यशस्वी घोडदौड करत जागतिक स्तरावरील अधिकाऱ्यांच्या स्पर्धेत मानाचा पाचवा क्रमांक पटकावून महाराष्ट्राच्या आणि देशाच्या शिरपेचात मानाचा तुरा रोवला आहे. जागतिक पातळीवरील सुरक्षा यंत्रणांच्या अधिकाऱ्यांसमोर आपले कौशल्य सिद्ध करत त्यांनी मिळवलेले हे यश अत्यंत कौतुकास्पद मानले जात आहे.
श्रीमती रेश्मा सुदाम डफळ यांच्या या ऐतिहासिक आणि उल्लेखनीय यशाबद्दल रायगड जिल्ह्यासह संपूर्ण महाराष्ट्र पोलीस दलातून त्यांच्यावर अभिनंदनाचा वर्षाव होत आहे. रायगड जिल्ह्याच्या माननीय पोलीस अधीक्षक श्रीमती आँचल दलाल यांनी रेश्मा डफळ यांच्या या दैदिप्यमान यशाची विशेष दखल घेत त्यांचे जाहीर कौतुक केले. पोलीस अधीक्षक कार्यालयात आयोजित एका विशेष कार्यक्रमात श्रीमती आँचल दलाल यांनी रेश्मा डफळ यांना सन्मानित केले आणि त्यांच्या पाठीवर कौतुकाची थाप दिली. हा बहुमान केवळ रायगड पोलिसांचा नसून संपूर्ण राज्याचा गौरव वाढवणारा आहे, अशा शब्दांत त्यांनी डफळ यांचे कौतुक केले तसेच त्यांच्या पुढील उज्ज्वल आणि कर्तव्यदक्ष वाटचालीसाठी मनापासून शुभेच्छा दिल्या. एका महिला अधिकाऱ्याने जागतिक स्तरावरील इतक्या कठीण प्रशिक्षणात मिळवलेले हे यश राज्यातील इतर सर्व महिला पोलीस अंमलदार आणि अधिकाऱ्यांसाठी अत्यंत प्रेरणादायी ठरणारे आहे.
Comments
Post a Comment