सैन्य दलात नोकरी लावण्याच्या बहाण्याने तब्बल १९ लाखांची फसवणूक!
खारघरमधील आरोपीला कोलाड पोलिसांकडून अटक
रोहा-रायगड, दि. २१ (प्रतिनिधी) :- भारतीय सैन्य दलात (आर्मी) नोकरीला लावण्याचे आमिष दाखवून तरुणांची तब्बल १९ लाख ६७ हजार ५०० रुपयांची फसवणूक करणाऱ्या खारघरमधील एका भामट्याला कोलाड पोलिसांनी बेड्या ठोकल्या आहेत. या प्रकरणी कोलाड पोलीस ठाण्यात गुन्हा दाखल करण्यात आला असून पोलीस या प्रकरणाचा अधिक तपास करत आहेत.
याबाबत सविस्तर वृत्त असे की, कोलाड आंबेवाडी गावच्या हद्दीत हा फसवणुकीचा प्रकार घडला. पनवेल येथील खारघर सेक्टर १५, घरकुल सी-२३, रूम नंबर ६ येथे राहणाऱ्या एका भामट्याने रोहा तालुक्यातील आंबेवाडी (पो. कोलाड) येथील रहिवासी असलेले फिर्यादी आणि त्यांच्या काही साक्षीदार मित्रांना गाठले. आपल्याला सैन्य दलात मोठी ओळख असून तरुणांना लष्करात नोकरीला लावून देऊ शकतो, असे मोठे आमिष या आरोपीने त्यांना दाखवले. सुरुवातीला फिर्यादी आणि त्यांच्या मित्रांचा विश्वास संपादन केल्यानंतर, आरोपीने नोकरीच्या प्रक्रियेचा खर्च आणि विविध कारणांचे आमिष दाखवून त्यांच्याकडून वेळोवेळी पैसे उकळण्यास सुरुवात केली.
आरोपीने स्वतःच्या आर्थिक फायद्यासाठी फिर्यादी आणि साक्षीदारांकडून ऑनलाईन माध्यमातून, बँकेच्या चेकद्वारे तसेच काही रक्कम रोख स्वरूपात, असे एकूण १९ लाख ६७ हजार ५०० रुपये उकळले. मात्र, इतकी मोठी रक्कम घेतल्यानंतरही आरोपीने त्यांना कोणत्याही प्रकारची नोकरी लावून दिली नाही. काही दिवसांनी जेव्हा फिर्यादी आणि त्यांच्या मित्रांनी नोकरीबाबत किंवा आपले पैसे परत मिळण्याबाबत आरोपीशी संपर्क साधण्याचा प्रयत्न केला, तेव्हा आरोपीने त्यांचे फोन उचलण्यास टाळाटाळ करण्यास सुरुवात केली. आपली फसवणूक झाल्याचे आणि विश्वासाने दिलेले पैसे आरोपीने संगनमत करून हडप केल्याचे लक्षात आल्यानंतर फिर्यादी यांनी कोलाड पोलीस ठाण्यात धाव घेऊन रीतसर तक्रार दाखल केली.
या तक्रारीच्या आधारे कोलाड पोलिसांनी तातडीने चक्र फिरवून आरोपीचा शोध सुरू केला. अखेर २० जून २०२६ रोजी रात्री १०:५२ वाजण्याच्या सुमारास कोलाड पोलिसांना आरोपीला अटक करण्यात यश आले आहे. या संपूर्ण फसवणुकीच्या प्रकरणाबाबत कोलाड पोलीस ठाण्यात गुन्हा रजिस्टर नंबर ८०/२०२६ नुसार, भारतीय न्याय संहिता (BNS) २०२३ चे कलम ३१८ (४), ३१६ (२) आणि ३ (५) प्रमाणे गुन्हा दाखल करण्यात आला आहे. या गुन्ह्याचा पुढील अधिक तपास कोलाड पोलीस ठाण्याचे पोलीस उपनिरीक्षक महाडीक हे करत आहेत. या गुन्ह्यात आणखी कोणाचा सहभाग आहे का आणि अशाच प्रकारे आरोपीने इतरही तरुणांना फसवले आहे का, याचा शोध आता पोलिसांकडून घेतला जात आहे.
Comments
Post a Comment