पाली परिसरात महिलेचा विनयभंग!
रस्ता विचारण्याच्या बहाण्याने नराधमाचे कृत्य
पाली-रायगड, दि. ९ (प्रतिनिधी) :- रायगड जिल्ह्यातील सुधागड तालुक्यातील पाली पोलीस ठाण्याच्या हद्दीत एका महिलेचा विनयभंग झाल्याची संतापजनक घटना नुकतीच उघडकीस आली आहे. मौजे आतोणे परिसरात घडलेल्या या घटनेमुळे स्थानिक महिलांमध्ये भीतीचे आणि संतापाचे वातावरण निर्माण झाले असून, पोलिसांनी याप्रकरणी तातडीने गुन्हा दाखल केला आहे.
मिळालेल्या सविस्तर माहितीनुसार, आतोणे गावातील सार्वजनिक विहिरीवरून पिण्याचे पाणी भरून फिर्यादी महिला आपल्या डोक्यावर पाण्याचे दोन हांडे घेऊन घराकडे परतत होत्या. सायंकाळी साडेपाच वाजेच्या सुमारास त्या विहिरीकडून आतोणे आदिवासी वाडीकडे जाणाऱ्या कच्च्या रस्त्यावरून पायी चालत जात असताना, दबा धरून बसलेल्या आरोपीने त्यांना गाठले. आरोपीने सुरुवातीला संबंधित महिलेला पालीकडे जाण्याचा रस्ता विचारला. रस्ता विचारण्याच्या बहाण्याने त्याने दोन वेळा विचारणा करून महिलेचा विश्वास संपादन करण्याचा प्रयत्न केला आणि त्यानंतर संधी साधून मागून येत महिलेचे तोंड दाबले.
अचानक झालेल्या या हल्ल्यामुळे महिला भयभीत झाली. आरोपीने बळजबरीने महिलेचा विनयभंग करून तिच्या मनास लज्जा उत्पन्न होईल असे कृत्य केले. या अनपेक्षित प्रकारामुळे पीडित महिलेने प्रतिकार करण्याचा प्रयत्न केला असता आरोपीने तिथून पळ काढला. या घटनेनंतर पीडित महिलेने तत्काळ पाली पोलीस ठाण्यात धाव घेऊन आपबिती सांगितली. पोलिसांनी घटनेचे गांभीर्य ओळखून फिर्यादीच्या तक्रारीवरून संबंधित आरोपीविरुद्ध गुन्हा दाखल केला आहे.
याप्रकरणी पाली पोलीस ठाण्यात गुन्हा रजिस्टर क्रमांक ५९/२०२६ नुसार भारतीय न्याय संहिता २०२३ च्या कलम ७४ अंतर्गत विनयभंगाचा गुन्हा नोंदवण्यात आला आहे. या प्रकरणाचा पुढील सखोल तपास महिला पोलीस हवालदार प्रतीक्षा गायकवाड या करत असून, आरोपीचा शोध घेण्यासाठी पोलिसांची पथके रवाना झाली आहेत. भरदिवसा घडलेल्या या घटनेमुळे ग्रामीण भागातील महिलांच्या सुरक्षेचा प्रश्न पुन्हा एकदा ऐरणीवर आला असून, पोलिसांनी परिसरात गस्त वाढवावी अशी मागणी ग्रामस्थांकडून केली जात आहे.
Comments
Post a Comment