रोहा येथून पोकलेनचे बकेट आणि दुचाकी लंपास!
उत्तर प्रदेशातील आरोपीविरुद्ध गुन्हा दाखल
२ लाख ४० हजारांच्या मुद्देमालाची चोरी
रोहा-रायगड, दि. २९ (प्रतिनिधी) :- रोहा पोलीस ठाण्याच्या हद्दीत एका मजुरानेच आपल्या मालकाच्या विश्वासाला तडा देत तब्बल २ लाख ४० हजार रुपये किमतीच्या मुद्देमालाची चोरी केल्याची खळबळजनक घटना उघडकीस आली आहे. या प्रकरणी सुधागड-पाली येथील रहिवासी असलेल्या फिर्यादी यांनी रोहा पोलीस ठाण्यात तक्रार दाखल केली असून, पोलिसांनी उत्तर प्रदेशातील संशयित आरोपीविरुद्ध गुन्हा दाखल करून पुढील तपास सुरू केला आहे.
याबाबत पोलिसांकडून मिळालेल्या सविस्तर माहितीनुसार, फिर्यादी हे पाली येथील परमार बिल्डिंग, बँक ऑफ इंडिया शेजारी, तालुका सुधागड येथे राहतात. त्यांच्याकडे मूळचा छमाईबस्ती, तालुका सागरी, जिल्हा आजमगड, राज्य उत्तर प्रदेश येथील रहिवासी असलेला एक इसम कामगार म्हणून कार्यरत होता. रोहा तालुक्यातील मौजे म्हाळुंगे येथील रोहा-चणेरा रस्त्यालगत मातीच्या भरावाचे काम सुरू असल्याने, फिर्यादी यांनी आपली यंत्रसामग्री आणि वाहने त्या ठिकाणी ठेवली होती. याच मातीच्या भरावाच्या ठिकाणाहून फिर्यादी यांच्या मालकीचे पोकलेन मशीनचे २,००,००० (दोन लाख) रुपये किमतीचे बकेट आणि अंदाजे ४०,००० (चाळीस हजार) रुपये किमतीची होंडा सीबी शाईन मोटारसायकल (क्र. एम एच ०६ बी यु ८५८८) अचानक गायब झाल्याचे निदर्शनास आले.
फिर्यादी यांच्याकडेच कामाला असलेल्या या उत्तर प्रदेशातील आरोपीने फिर्यादी यांची कोणतीही संमती न घेता, केवळ लबाडीच्या आणि चोरीच्या उद्देशाने हे दोन्ही मौल्यवान ऐवज तेथून चोरून नेल्याचे निष्पन्न झाले. स्वतःच्या मालकाचीच फसवणूक करून रोहा-चणेरा रोडवरून मुद्देमाल लंपास केल्याचे समोर आल्यानंतर फिर्यादी यांनी तात्काळ रोहा पोलीस ठाण्यात धाव घेत घडलेल्या प्रकाराची तक्रार दिली. या तक्रारीवरून रोहा पोलिसांनी तात्काळ कारवाई करत गुन्हा रजिस्टर नंबर १४१/२०२६ नुसार, भारतीय दंड विधान कलम ३८१ आणि भारतीय न्याय संहिता कलम ३०६ अन्वये गुन्हा दाखल केला आहे. या चोरीच्या घटनेमुळे परिसरात एकच खळबळ उडाली असून, गुन्हा दाखल झाल्यानंतर पोलिसांनी आरोपीचा शोध घेण्यासाठी चक्रावून तपास सुरू केला आहे. या प्रकरणाचा अधिक सखोल तपास आणि आरोपीचा शोध रोहा पोलीस ठाण्याचे पोलीस हवादार भास्कर शिद हे वरिष्ठांच्या मार्गदर्शनाखाली करत आहेत.
Comments
Post a Comment