रोहा येथे मॉर्निंग वॉकवरून परतणाऱ्या महिलेची सोन्याची चेन हिसकावली!
प्रतिकार करणाऱ्या स्वच्छता कामगारालाही मारहाण, दोघेजण फरार
रोहा-रायगड, दि. ३१ (प्रतिनिधी) :- रोहा पोलीस ठाण्याच्या हद्दीत एका निवासी इमारतीमध्ये भरदिवसा जबरी चोरीची एक धक्कादायक घटना समोर आली आहे. मॉर्निंग वॉकवरून परतणाऱ्या एका महिलेला गाठून अज्ञात चोरट्याने तिच्या गळ्यातील सोन्याची चेन जबरदस्तीने खेचून नेल्याची घटना घडली असून, या प्रकरणी रोहा पोलीस ठाण्यात गुन्हा दाखल करण्यात आला आहे.
मिळालेल्या सविस्तर माहितीनुसार, रोहा येथील अमरविला अपार्टमेंटमध्ये ही घटना घडली. या इमारतीत राहणाऱ्या महिला फिर्यादी या आपले मॉर्निंग वॉक संपवून घरी परतत होत्या. त्या इमारतीच्या लिफ्टने आपल्या चौथ्या मजल्यावर आल्या आणि लिफ्टमधून बाहेर पडत असतानाच, तिथे आधीच दबा धरून बसलेल्या एका अज्ञात आरोपीने (आरोपी क्रमांक १) त्यांच्यावर अचानक हल्ला केला. या चोरट्याने फिर्यादी महिलेच्या गळ्यातील सुमारे १,४५,०००/- रुपये किमतीची सोन्याची चेन अत्यंत वेगाने आणि जबरदस्तीने खेचली. या झटापटीदरम्यान महिलेने प्रतिकार करण्याचा प्रयत्न केला असता, आरोपीने त्यांच्या गळ्यावर आणि छातीवर जोरात बुक्क्यांनी मारहाण करून त्यांना जखमी केले.
सोन्याची चेन हिसकावून आरोपी जेव्हा इमारतीवरून खाली पळून जात होता, तेव्हा तिथेच इमारतीमध्ये साफसफाईचे काम करणाऱ्या एका वयस्कर व्यक्तीने (साफसफाई करणारे मामा) प्रसंगावधान राखून त्या चोरट्याला पकडण्याचा धाडसी प्रयत्न केला. मात्र, स्वतःची सुटका करून घेण्यासाठी त्या आरोपीने या साफसफाई करणाऱ्या कर्मचाऱ्यालाही लाथाबुक्क्यांनी बेदम मारहाण केली आणि त्यांना दुखापत करून तो इमारतीबाहेर पळाला. इमारतीच्या बाहेर त्याचा दुसरा साथीदार (आरोपी क्रमांक २) हा मोटारसायकल चालू ठेवून आधीच त्याची वाट पाहत थांबला होता. इमारतीतून बाहेर पडताच आरोपी क्रमांक १ हा त्याच्या साथीदाराच्या मोटारसायकलवर मागे बसला आणि दोन्ही अज्ञात आरोपी भरधाव वेगाने तिथून पसार झाले. भरदिवसा घडलेल्या या जबरी चोरीच्या थरारामुळे परिसरात आणि इमारतीमधील रहिवाशांमध्ये मोठी घबराट पसरली आहे.
या गंभीर घटनेबाबत पीडित महिलेने त्वरित रोहा पोलीस ठाण्यात धाव घेऊन तक्रार नोंदवली आहे. त्यांच्या तक्रारीवरून रोहा पोलिसांनी अज्ञात दोन्ही आरोपींविरोधात रोहा पोलीस ठाणे गुन्हा रजिस्टर नंबर १४४/२०२६ नुसार, भारतीय न्याय संहिता (BNS) २०२३ चे कलम ३०९(६) आणि कलम ३(५) अंतर्गत गुन्हा दाखल केला आहे. या संपूर्ण प्रकरणाचे गांभीर्य लक्षात घेऊन पोलिसांकडून तात्काळ तपासाची चक्रे फिरवण्यात आली असून, या प्रकरणाचा पुढील अधिक तपास सहाय्यक पोलीस निरीक्षक सूर्यकांत पवार हे करीत आहेत. परिसरातील सीसीटीव्ही फुटेज आणि इतर माहितीच्या आधारे पोलीस सध्या फरार आरोपींचा कसून शोध घेत आहेत.
Comments
Post a Comment