हिरानंदानी फॉरच्यून सिटी कंस्ट्रक्शन साईटवर मोठी चोरी!
१० ते १२ अज्ञात इसमांनी ६ लाखांचा मुद्देमाल लांबवला
रसायनी, दि. २६ (प्रतिनिधी) :- पनवेल तालुक्यातील रसायनी पोलीस ठाण्याच्या हद्दीत असलेल्या मौजे हिरानंदानी फॉरच्यून सिटी येथील कंस्ट्रक्शन साईटवर धाडसी चोरीची घटना घडली आहे. दिनांक २५ एप्रिल २०२६ रोजी पहाटे साडेतीन वाजेच्या सुमारास ही घटना घडली असून, या चोरीमुळे परिसरात मोठी खळबळ उडाली आहे. भोकरपाडा येथील हिरानंदानी कंस्ट्रक्शनच्या 'सोशल हाऊसिंग' या प्रकल्पाच्या जागेवर १० ते १२ अज्ञात चोरट्यांनी संगनमताने हा दरोडा टाकला.
मिळालेल्या माहितीनुसार, सदर चोरट्यांनी स्वतःच्या आर्थिक फायद्यासाठी आणि लबाडीच्या इराद्याने या गुन्ह्याचा कट रचला होता. पहाटेच्या सुमारास जेव्हा सर्वत्र शांतता होती, तेव्हा या टोळीने बांधकाम साईटवर प्रवेश केला. फिर्यादी, जे भोकरपाडा येथील रहिवासी आहेत, त्यांच्या संमतीशिवाय आणि कोणत्याही कायदेशीर अधिकाराशिवाय चोरट्यांनी साईटवरील तब्बल ६ लाख ३० हजार रुपये किमतीचा मौल्यवान माल एका टेम्पोमध्ये भरला. हा सर्व माल अतिशय नियोजनबद्ध पद्धतीने टेम्पोमध्ये लोड करून चोरटे घटनास्थळावरून पसार झाले.
या प्रकरणी रसायनी पोलीस ठाण्यात रीतसर तक्रार दाखल करण्यात आली असून, पोलिसांनी भारतीय न्याय संहिता (BNS) २०२३ च्या कलम ३०३(२) आणि ३(५) अन्वये गुन्हा रजिस्टर क्रमांक ६४/२०२६ नुसार नोंदवला आहे. एवढ्या मोठ्या संख्येने आलेल्या चोरट्यांनी ज्या पद्धतीने हा माल लंपास केला, त्यावरून यामागे एखादी मोठी टोळी असण्याची शक्यता वर्तवण्यात येत आहे. या प्रकरणाचे गांभीर्य लक्षात घेऊन रसायनी पोलिसांनी तातडीने तपासाची चक्रे फिरवली आहेत. या गुन्ह्याचा अधिक तपास पोलीस उपनिरीक्षक मंगेश बाचकर हे करीत असून, पोलीस सीसीटीव्ही फुटेज आणि इतर तांत्रिक पुराव्यांच्या आधारे अज्ञात आरोपींचा शोध घेत आहेत. या धाडसी चोरीमुळे बांधकाम व्यवसायातील सुरक्षा व्यवस्थेचा प्रश्न पुन्हा एकदा ऐरणीवर आला आहे.
Comments
Post a Comment