तळा तालुक्यातील रहाटाडमधून १७ वर्षीय अल्पवयीन मुलीचे अपहरण
तळा, दि. २ (प्रतिनिधी) :- रायगड जिल्ह्यातील तळा पोलीस ठाण्याच्या हद्दीतून एक धक्कादायक घटना समोर आली असून, मौजे रहाटाड येथील एका १७ वर्षीय अल्पवयीन मुलीला अज्ञात इसमाने फूस लावून पळवून नेल्याची घटना घडली आहे. याप्रकरणी तळा पोलीस ठाण्यात अपहरणाचा गुन्हा दाखल करण्यात आला असून पोलीस प्रशासनाकडून मुलीचा कसून शोध घेतला जात आहे.
मिळालेल्या सविस्तर माहितीनुसार, रहाटाड येथे राहणारी १७ वर्षे ५ महिने आणि १२ दिवस वयाची मुलगी ३० मार्च २०२६ रोजी रात्री ८:३० वाजण्याच्या सुमारास आपल्या घरातून बाहेर पडली होती. "मी करंजे किराणा स्टोअर्समध्ये खाऊ आणण्यासाठी जात आहे," असे तिने आपल्या पालकांना सांगितले होते. मात्र, बराच वेळ उलटून गेल्यानंतरही ती मुलगी घरी परतली नाही. मुलगी घरी न आल्याने काळजीत पडलेल्या तिच्या पालकांनी व नातेवाईकांनी तातडीने आजूबाजूच्या परिसरात आणि गावात तिचा शोध घेण्यास सुरुवात केली.
रात्रभर सर्वत्र शोध घेऊनही मुलीचा कोणताही पत्ता लागला नाही. तपासादरम्यान, सदर मुलगी ही अल्पवयीन आहे हे माहित असतानाही, तिला कोणीतरी अज्ञात इसमाने कशाचे तरी आमिष दाखवून किंवा फूस लावून पालकांच्या कायदेशीर रखवालीतून पळवून नेल्याचा संशय बळावला. अखेर याप्रकरणी मुलीच्या नातेवाईकांनी तळा पोलीस ठाण्यात धाव घेऊन तक्रार दाखल केली.
या फिर्यादीवरून तळा पोलीसांनी अज्ञात आरोपीविरुद्ध तळा पोलीस ठाणे गु.र.नं. १७/२०२६ नुसार, भारतीय न्याय संहिता (BNS) २०२३ चे कलम १३७(२) अन्वये गुन्हा दाखल केला आहे. या घटनेमुळे परिसरात चिंतेचे वातावरण पसरले असून पोलीस उपनिरीक्षक कदम या प्रकरणाचा अधिक तपास करीत आहेत. पोलीस संबंधित भागातील सीसीटीव्ही फुटेज आणि संशयित व्यक्तींच्या हालचालींवर लक्ष ठेवून असून, लवकरच या गुन्ह्याचा छडा लावला जाईल असा विश्वास पोलीसांनी व्यक्त केला आहे.
Comments
Post a Comment