नेरळमध्ये बालविवाहातून अल्पवयीन मुलगी गर्भवती
आरोपीवर 'पोक्सो'सह विविध कलमान्वये गुन्हा दाखल
नेरळ, दि. २३ (प्रतिनिधी) :- कर्जत तालुक्यातील कोल्हारे परिसरात एक धक्कादायक प्रकार समोर आला असून, एका अल्पवयीन मुलीशी विवाह करून तिचे लैंगिक शोषण केल्याप्रप्रकरणी नेरळ पोलीस ठाण्यात एका नराधमावर गुन्हा दाखल करण्यात आला आहे. पिडीत मुलगी अल्पवयीन असल्याची पूर्ण कल्पना असतानाही आरोपीने तिच्याशी विवाह केला आणि त्यातून पिडीतेने एका अपत्याला जन्म दिल्याची धक्कादायक बाब उघडकीस आली आहे.
या प्रकरणातील सविस्तर वृत्त असे की, मौजे कोल्हारे येथील रहिवासी असलेल्या एका अल्पवयीन मुलीला आरोपीने लग्नाचे आमिष दाखवून किंवा तिला विश्वासात घेऊन १ मे २०२४ रोजी विवाह केला होता. हा विवाह बेकायदेशीर असतानाही आरोपीने पिडीतेला आपल्या कोल्हारे येथील घरी नेले. त्यानंतर मे २०२५ ते सप्टेंबर २०२५ या कालावधीत त्याने पिडीतेच्या संमतीशिवाय आणि ती अल्पवयीन असल्याचे माहित असूनही तिच्यावर वेळोवेळी बलात्कार केला. या लैंगिक शोषणातून पिडीत मुलगी गर्भवती राहिली आणि १ मार्च २०२६ रोजी तिची प्रसूती होऊन तिने एका अपत्याला जन्म दिला.
अल्पवयीन मुलीचा विवाह लावून देणे आणि तिचे लैंगिक शोषण करणे हा गंभीर गुन्हा असल्याने याप्रकरणी आता नेरळ पोलीस ठाण्यात दाद मागण्यात आली आहे. पोलिसांनी या घटनेची गांभीर्याने दखल घेत आरोपीविरुद्ध भारतीय न्याय संहिता २०२३ चे कलम ६४(२)(आय) सह बालकांचे लैंगिक अपराधांपासून संरक्षण अधिनियम (पोक्सो) २०१२ चे कलम ४ व ६, तसेच बालविवाह प्रतिबंधक अधिनियम २००६ चे कलम ९ नुसार गुन्हा रजिस्टर क्रमांक ५७/२०२६ अन्वये गुन्हा दाखल केला आहे. या प्रकरणाचा पुढील अधिक तपास महिला पोलीस उपनिरीक्षक प्राची पांगे या करत असून, आरोपीवर कठोर कायदेशीर कारवाई करण्याची प्रक्रिया सुरू आहे. या घटनेमुळे परिसरात बालविवाहाच्या प्रथेवर आणि अल्पवयीन मुलींच्या सुरक्षेवर पुन्हा एकदा प्रश्नचिन्ह उपस्थित झाले आहे.
टीप :- बातमीतील घटनेच्या चांगल्या सादरीकरणासाठी (Presentation) आणि ग्राफिक्ससाठी AI तंत्रज्ञानाचा वापर केला आहे.
Comments
Post a Comment