मुंबई-गोवा महामार्गावर पेण नजीक लोखंडी कॉईल घेऊन जाणाऱ्या ट्रेलरला अपघात 

 चालक गंभीर जखमी 

अलिबाग-रायगड, दि. ११ (स्वप्निल नाईक) :- वाहन क्रमांक MH46 BU 1359 व MH04 FP 5636 हे दोन्ही ट्रेलर मुंबई–गोवा महामार्गावर मुंबईच्या दिशेने जात असताना पेण जवळील पुलावर व आंतोरे फाट्याच्या अलिकडे भीषण अपघात झाला.

ट्रेलर क्रमांक MH46 BU 1359 हा पुढे जात असताना त्याच्या मागून येणाऱ्या ट्रेलर क्रमांक MH04 FP 5636 ने जोरदार धडक दिली. या धडकेमुळे दोन्ही ट्रेलरचे मोठ्या प्रमाणात नुकसान झाले असून चालकाच्या पायाला गंभीर दुखापत झाली आहे.

अपघाताची माहिती मिळताच पोलीस घटनास्थळी दाखल झाले असून अपघातात जखमी झालेल्या ट्रेलरचालकाला तातडीने रुग्णालयात दाखल करण्यात आले आहे. सध्या पोलीस प्रशासनाकडून रस्त्यावर झालेला वाहतुकीचा अडथळा दूर करण्याचे काम सुरू असून, वाहतूक सुरळीत करण्यासाठी आवश्यक ती कार्यवाही करण्यात येत आहे.