मुख्य संपादक : किशोर केणी, सहसंपादक : दिनेश चांगू मोरे, उपसंपादक : किरण लक्ष्मण मोरे
ब्रेकिंग न्यूज
🚨 रिलायन्स नागोठणे कंपनीसमोर भरधाव कारच्या धडकेत मुंढाणीच्या तरुण कामगाराचा जागीच मृत्यू; सुरक्षा व्यवस्थेच्या ढिसाळपणाविरोधात नागरिकांचा संताप 🚨

गुन्हेगारी नियंत्रणासाठी महाड शहर पोलिसांची धडक मोहीम

पोलीस निरीक्षक नारायण एकशिंगे यांच्या कार्यकाळात कारवायांना वेग


महाड-रायगड, दि. ५ (प्रतिनिधी) :- महाड शहर पोलीस ठाण्याचा कार्यभार पोलीस निरीक्षक नारायण एकशिंगे यांनी स्वीकारल्यापासून शहरात कायदा व सुव्यवस्था अबाधित राखण्यासाठी पोलिसांनी नियोजनबद्ध आणि कठोर पावले उचलली आहेत. पदभार स्वीकारताच त्यांनी गुन्हेगारी प्रवृत्तीवर वचक निर्माण करण्यावर भर दिला असून, विविध गंभीर गुन्ह्यांचा जलद गतीने छडा लावण्यासोबतच प्रत्यक्ष कारवायांचा धडाका सुरू ठेवला आहे. पोलिसांच्या या सतर्कतेमुळे शहरात शांततेचे वातावरण निर्माण झाले आहे.

​गेल्या काही कालावधीत महाड शहर पोलिसांनी शहरातील किराणा दुकाने, गोदामे तसेच संशयित वाहनांवर अचानक छापे टाकून शासनाने प्रतिबंधित केलेल्या गुटखा आणि सुगंधी तंबाखूच्या बेकायदेशीर साठ्याविरुद्ध धडक मोहीम राबवली. या कारवाईत मोठ्या प्रमाणावर प्रतिबंधित मुद्देमाल जप्त करून संबंधितांवर कठोर गुन्हे दाखल करण्यात आले आहेत. याव्यतिरिक्त, नागरिकांचे हरवलेले किंवा चोरीला गेलेले मोबाईल शोधण्यासाठी केंद्रीय दूरसंचार विभागाच्या 'CEIR' प्रणालीचा प्रभावी वापर करत पोलिसांनी लाखो रुपयांचे गहाळ मोबाईल शोधून ते मूळ मालकांना परत मिळवून देण्याची दिलासादायक कामगिरी केली आहे. चोरी, घरफोडी व मारामारीसारख्या गुन्ह्यांतही तांत्रिक तपासाच्या आधारे संशयितांना ताब्यात घेऊन कायदेशीर कारवाई करण्यात पोलिसांना यश आले आहे.

​शहरातील कायदा व सुव्यवस्था अधिक मजबूत करण्यासाठी रात्रकालीन व पायी गस्त सक्षम करण्यात आली आहे. रेकॉर्डवरील सराईत गुन्हेगारांवर प्रतिबंधात्मक पाळत ठेवण्यात येत असून, बाजारपेठ, गर्दीचे चौक तसेच शाळा-महाविद्यालयांच्या परिसरात महिलांच्या सुरक्षिततेसाठी निर्भया पथकाची नियमित नजर आहे. पोलीस ठाण्यात येणाऱ्या सर्वसामान्य तक्रारदारांच्या अडचणींची तत्परतेने दखल घेऊन त्यांना विनाविलंब न्याय मिळवून देण्यावर भर दिला जात आहे.

​कारवायांसोबतच नागरिकांमध्ये जनजागृती निर्माण करण्यासाठी महाड शहर पोलिसांनी महत्त्वाचे आवाहन केले आहे. सध्या वाढत्या डिजिटल व्यवहारामुळे सायबर फसवणुकीच्या घटनांमध्ये वाढ होत असल्याचे दिसून येत आहे. या पार्श्वभूमीवर, अनोळखी व्यक्तीकडून येणारे फोन कॉल्स, बनावट लॉटरीचे मेसेज, बँक केवायसी (KYC) अपडेटच्या नावाखाली येणाऱ्या लिंक्स यांवर नागरिकांनी विश्वास ठेवू नये, तसेच आपल्या बँकेचा ओटीपी (OTP), पासवर्ड किंवा पिन कोणाशीही शेअर करू नये, असे आवाहन पोलिसांनी केले आहे. सायबर फसवणूक झाल्यास नागरिकांनी तात्काळ १९३० या राष्ट्रीय हेल्पलाईनवर अथवा जवळच्या पोलीस ठाण्यात संपर्क साधावा, असे स्पष्ट करण्यात आले आहे.

​तसेच शहरातील अंतर्गत रस्त्यांवरील वाहतूक सुरळीत व सुरक्षित राहण्यासाठी वाहनचालकांनी वाहतूक नियमांचे काटेकोर पालन करण्याचे आवाहन करण्यात आले आहे. दुचाकी चालवताना हेल्मेटचा वापर, चारचाकी वाहनात सीटबेल्ट लावणे, वेगमर्यादेचे पालन आणि नो-पार्किंगच्या ठिकाणी वाहने उभी न करता बाजारपेठेतील वाहतुकीस सहकार्य करण्याचे आवाहन पोलीस निरीक्षक नारायण एकशिंगे यांनी केले आहे. नियम मोडणाऱ्यांवर कायद्यानुसार दंडात्मक कारवाई केली जाईल, असा इशाराही पोलिसांनी दिला आहे. गुन्हेगारी नियंत्रण, सामाजिक सुरक्षा आणि नागरिकांमधील जनजागृती या तिन्ही आघाड्यांवर महाड शहर पोलिसांनी घेतलेल्या या भूमिकेचे शहरातून कौतुक होत आहे.

Comments

Popular posts from this blog