सण-उत्सवांत डोळ्यात तेल घालून कर्तव्य बजावणाऱ्या महाराष्ट्र पोलिसांना मानाचा सलाम!
आम्ही साजरे करतो सण, ते मात्र उन्हातान्हात जपतात सामाजिक सौख्य
नेरूळ-नवी मुंबई, दि. २७ (प्रदीप पाटील) :- सण-उत्सवांच्या काळात संपूर्ण राज्यभरात आनंदाचे आणि उत्साहाचे वातावरण असते. नुकताच लाडक्या गणरायाचा दहा दिवसांचा उत्सव भाविकांनी अत्यंत मनोभावे साजरा केला आणि बाप्पाला भक्तीभावाने निरोप दिला. मात्र, सर्वसामान्य जनता जेव्हा आपले कुटुंब आणि मित्रपरिवारासह हे सण सुखासमाधानाने साजरे करत असते, तेव्हा समाजातील शांतता आणि सुव्यवस्था अबाधित ठेवण्याचे सर्वात मोठे श्रेय महाराष्ट्र पोलीस दलाला जाते. ज्याप्रमाणे देशाच्या सीमेवर रात्रंदिवस खडा पहारा देणाऱ्या जवानांमुळे संपूर्ण देश शांततेत झोपू शकतो, त्याचप्रमाणे राज्यातील प्रत्येक चौकात, रस्त्यावर आणि गल्लीबोळात पोलिसांचा चोख बंदोबस्त असल्याने नागरिक निर्धास्तपणे उत्सव साजरे करू शकतात.
स्वतःच्या कुटुंबाचे, लहान मुलाबाळांचे सुख आणि सणांचा आनंद बाजूला ठेवून केवळ सामाजिक सौख्य टिकवून ठेवण्यासाठी पोलीस कर्मचारी डोळ्यात तेल घालून आपले कर्तव्य पार पाडत असतात. गर्दीवर नियंत्रण ठेवणे, कायदा व सुव्यवस्था राखणे आणि मतीधुंद व अपप्रवृत्त तरुणांना शिस्त लावून गैरप्रकारांना आळा घालण्यासाठी पोलिसांना प्रसंगी कठोर धोरण अवलंबावे लागते. अनेकदा सामान्य नागरिकांना पोलिसांचा स्वभाव तिरसट किंवा कडक वाटतो, परंतु दिवसभर भर उन्हात उभे राहून, तणावाखाली ड्युटी करताना वेगवेगळ्या प्रवृत्तीच्या व अरेरावी करणाऱ्या लोकांना सामोरे जावे लागते, याचा विचार क्वचितच केला जातो. सण-उत्सवांत आपल्याही कुटुंबात रमाण व्हावे ही मानवी भावना असूनही ती नजरेआड करून पोलीस अहोरात्र काम करतात, त्यामुळे त्यांच्याशी उद्धटपणे न वागता सामंजस्याने व प्रेमाने वागणे गरजेचे आहे.
समाजातील प्रत्येक कार्यक्रम आणि सण निर्विघ्नपणे पार पडावा हेच ध्येय ठेवून कार्य करणाऱ्या या खाकी वर्दीतील जवानांना समाजाकडून केवळ माणुसकी आणि आपुलकीच्या दृष्टिकोनाची अपेक्षा असते. त्यामुळे नागरिकांनीही पोलिसांच्या कार्याप्रती कृतज्ञता व्यक्त केली पाहिजे. रणरणत्या उन्हात रस्त्यांवर आणि ट्रॅफिक सिग्नलवर उभे राहून कर्तव्य बजावणाऱ्या पोलीस हवालदारांना किमान पिण्याच्या पाण्याची बाटली देऊन किंवा आपुलकीची विचारपूस करून आपण त्यांच्या चेहऱ्यावर समाधानाची लकेर फुलवू शकतो. नागरिकांचे छोटेसे सहकार्य आणि आपुलकीचे दोन शब्द पोलिसांचे मनोबल उंचावण्यासाठी अत्यंत मोलाचे ठरतात. शांतता आणि सुरक्षिततेसाठी झटणाऱ्या महाराष्ट्र पोलीस दलाच्या या अतुलनीय सेवेला समाजाने मनापासून सलाम केला पाहिजे.
Comments
Post a Comment