पेण पोलीस ठाण्यात ‘एक राखी व्यसनमुक्तीसाठी’ या अनोख्या उपक्रमाचा शुभारंभ!
सणाच्या पवित्र बंधनाला जोडली सामाजिक बांधिलकी
पेण-रायगड, दि. २९ (प्रतिनिधी) :- रक्षाबंधनाच्या पवित्र सणाचे औचित्य साधून पेण पोलीस ठाण्याच्या वतीने एका अत्यंत स्तुत्य आणि सामाजिक भान जपणाऱ्या उपक्रमाचा शुभारंभ करण्यात आला आहे. ‘एक राखी… व्यसनमुक्तीच्या संकल्पासाठी’ या संकल्पनेवर आधारित या मोहिमेद्वारे समाजातील तरुणाईला तसेच नागरिकांना व्यसनापासून परावृत्त करण्याचा अभिनव संदेश देण्यात आला. बहिण-भावाच्या अथांग प्रेमाचे प्रतीक असलेल्या या सणाला व्यसनमुक्तीच्या संकल्पाची जोड दिल्याने या उपक्रमाचे सर्वच स्तरांतून मोठे कौतुक होत आहे.
रक्षाबंधन हा केवळ हातावर धागा बांधण्याचा सण नसून, ते संरक्षणाचे आणि विश्वासाचे एक अतूट बंधन असते. मात्र, आजच्या काळात वाढत्या व्यसनाधीनतेमुळे अनेक घरे उद्ध्वस्त होत आहेत आणि कुटुंबांचे आरोग्य धोक्यात येत आहे. याच पार्श्वभूमीवर पेण पोलिसांनी एक सकारात्मक पाऊल उचलत या उपक्रमाची आखणी केली. भावाने स्वतःला व्यसनापासून दूर ठेवत, निरोगी आणि उत्तम आरोग्याचा केलेला संकल्प हीच बहिणीसाठी सर्वात मोठी आणि खरी प्रेमळ ओवाळणी ठरू शकते, हा विचार या उपक्रमाच्या केंद्रस्थानी ठेवण्यात आला आहे.
पोलीस ठाण्याच्या आवारात आयोजित या कार्यक्रमात उपस्थित मान्यवर, पोलीस अधिकारी, कर्मचारी आणि नागरिकांनी या मोहिमेत उत्स्फूर्त सहभाग नोंदवला. ‘राखीचे बंधन… व्यसनमुक्तीचे वचन’ या प्रभावी संदेशासह उपस्थित बांधवांना व्यसनांपासून दूर राहण्याची प्रतिज्ञा देण्यात आली. दारू, तंबाखू, गुटखा यांसारख्या घातक व्यसनांमुळे केवळ व्यक्तीचे नव्हे तर संपूर्ण कुटुंबाचे नुकसान होते. त्यामुळे या सणाच्या निमित्ताने प्रत्येक भावाने आपल्या बहिणीच्या संरक्षणासोबतच स्वतःच्या निरोगी आरोग्याची हमी दिली पाहिजे, असे आवाहन यावेळी करण्यात आले.
पेण पोलिसांनी सुरू केलेली ही मोहीम केवळ पोलीस ठाण्यापुरती मर्यादित न राहता संपूर्ण तालुक्यात आणि शहरात प्रभावीपणे राबवली जाणार आहे. समाजात व्यसनमुक्तीविषयी जनजागृती निर्माण करण्यासाठी आणि सणांचे औचित्य साधून विधायक विचारांचा प्रसार करण्यासाठी हा उपक्रम अत्यंत दिशादर्शक ठरत असून, नागरिकांनीही आपल्या घरातून या संकल्पाची सुरुवात करावी असे आवाहन पेण पोलीस प्रशासनाकडून करण्यात आले आहे.
Comments
Post a Comment