ठाणे पोलीस संघाची 'फायरिंग प्रशिक्षक' स्पर्धेत नेत्रदीपक कामगिरी चॅम्पियनशिप ट्रॉफी पटकावली!
ठाणे, दि. २० (प्रतिनिधी) :- ठाणे शहर पोलीस मुख्यालयाच्या संघाने फायरिंग प्रशिक्षक (Training of Trainer - TOT) प्रशिक्षण स्पर्धेत अत्यंत उत्कृष्ट कामगिरी करत मानाची चॅम्पियनशिप ट्रॉफी आपल्या नावावर केली आहे. या अत्यंत प्रतिष्ठेच्या आणि आव्हानात्मक स्पर्धेत ठाणे पोलीस दलातील जवानांनी आपल्या अचूक निशाणेबाजीची आणि उत्कृष्ट कौशल्याची चुणूक दाखवली. या स्पर्धेत वैयक्तिक कामगिरीतही ठाणे पोलिसांनी मोठे यश संपादन केले असून, महिला पोलीस शिपाई सोनाली अर्जुन गाडे यांनी अत्यंत चमकदार कामगिरी करत सुवर्ण पदक (गोल्ड मेडल) पटकावले, तर पोलीस हवालदार राहुल मधुकर राऊत यांनी आपल्या अचूक कौशल्याच्या जोरावर कांस्य पदक (ब्रॉन्झ मेडल) मिळवून ठाणे पोलिसांच्या शिरपेचात मानाचा तुरा रोवला. या सर्व विजेत्या खेळाडूंच्या आणि ठाणे शहर संघाच्या या ऐतिहासिक यशाबद्दल माननीय पोलीस महासंचालक यांच्या हस्ते एका विशेष समारंभात सर्व विजेत्यांचा गौरव करण्यात आला आणि त्यांना ट्रॉफी प्रदान करण्यात आली. या दैदिप्यमान यशामुळे ठाणे शहर पोलीस दलाचे नाव संपूर्ण राज्यात उंचावले असून, सर्व स्तरांतून या विजयी वीरांवर अभिनंदनाचा वर्षाव होत आहे.
Comments
Post a Comment