नागोठणे जवळील कोलेटी गावात घरगुती बांधकामावरून दोन गटांत हाणामारी!
दोन्ही बाजूंच्या तक्रारींवरून परस्परविरोधी गुन्हे दाखल
नागोठणे-रायगड (प्रतिनिधी) :- पेण तालुक्यातील नागोठणे पोलीस ठाण्याच्या हद्दीत येणाऱ्या मौजे कोलेटी येथे घराच्या बांधकामाच्या वादातून दोन कुटुंबांमध्ये भीषण हाणामारी झाल्याची घटना समोर आली आहे. या घटनेने संपूर्ण परिसरात खळबळ उडाली असून, याप्रकरणी नागोठणे पोलिसांनी दोन्ही गटांच्या तक्रारीवरून परस्परविरोधी गुन्हे दाखल केले आहेत. या वादात लोखंडी पहार, विटा आणि लाथाबुक्क्यांचा वापर करण्यात आल्याने दोन्ही बाजूंचे लोक जखमी झाले असून महिलांनाही मारहाण करण्यात आली आहे.
पहिल्या घटनेत, कोलेटी येथील फिर्यादी आपल्या घराच्या मागील बाजूस लोखंडी पाईप आणि पत्रे बसविण्याचे काम करत होते. यावेळी शेजारी राहणारे आरोपी तिथे आले आणि त्यांनी 'तुझे पाईप बाहेर आले आहेत' असे म्हणत कामाला आक्षेप घेतला. त्यावर फिर्यादीने 'तुझेही पाईप आणि पत्रे माझ्या भिंतीत आले आहेत, ते कामात अडथळा ठरत असल्याने आधी ते काढ' असे सुनावले. या शाब्दिक चकमकीचे रूपांतर लवकरच हिंसक वळणात झाले. आरोपानुसार, तिथे उपस्थित असलेल्या अन्य आरोपींनी फिर्यादीचे हात धरून ठेवले, तर मुख्य आरोपीने त्याच्याकडील लोखंडी पहार फिर्यादीच्या डोक्यात मारली. यामध्ये फिर्यादीच्या डोक्याला गंभीर इजा होऊन रक्तस्त्राव सुरू झाला. आपल्या मुलाला वाचवण्यासाठी फिर्यादीचे आई-वडील आणि पत्नी पुढे आले असता, एकूण सात जणांच्या जमावाने त्यांनाही बेदम मारहाण केली. या गोंधळात आरोपींनी फिर्यादीच्या आई-वडिलांना आणि पत्नीला विटांनी मारले, एका महिला आरोपीने फिर्यादीच्या वडिलांच्या खांद्याला चावा घेतला, तर मुख्य आरोपीने फिर्यादीच्या उजव्या हाताच्या दंडाचा चावा घेऊन दुखापत केली. तसेच महिलांना लाथाबुक्क्यांनी मारहाण करून शिवीगाळ करण्यात आली. याप्रकरणी नागोठणे पोलीस ठाण्यात गुन्हा रजिस्टर नंबर ८३/२०२६ नुसार भारतीय न्याय संहिता २०२३ च्या विविध कलमान्वये गुन्हा नोंदवण्यात आला आहे.
दुसरीकडे, याच घटनेच्या संदर्भात दुसऱ्या गटानेही पोलिसांत धाव घेत आपली फिर्याद नोंदवली आहे. त्यांच्या दाव्यानुसार, फिर्यादी आपल्या घरी बांधकाम करत असताना आरोपींनी तिथे येऊन बांधकाम थांबवण्यास सांगितले. फिर्यादीने 'आम्हाला ग्रामपंचायतीची रितसर परवानगी मिळाली आहे, त्यामुळे आम्ही काम करणारच' असे ठणकावून सांगितले. या गोष्टीचा राग मनात धरून आरोपींनी फिर्यादीच्या बहिणीच्या अंगावर धावून जाण्याचा प्रयत्न केला. जेव्हा फिर्यादी आणि त्यांची आई बहिणीला वाचवण्यासाठी गेले, तेव्हा एका आरोपीने फिर्यादीच्या डोक्यात वीट मारली, तर दुसऱ्या आरोपीने फिर्यादीच्या आईच्या डोक्यात लोखंडी पहार मारून त्यांना जखमी केले. या गटाचा असाही आरोप आहे की, सर्व आरोपींनी संगनमत करून फिर्यादीसह त्यांच्या कुटुंबातील सदस्यांना आणि प्रत्यक्षदर्शी साक्षीदारांना हाताबुक्क्यांनी मारहाण केली आणि जीवे मारण्याची धमकी दिली. तसेच संतापलेल्या आरोपींनी घराच्या खिडकीवर विटा फेकून घराचे नुकसान केले. या तक्रारीवरून नागोठणे पोलिसांनी गुन्हा रजिस्टर नंबर ८४/२०२६ नुसार भारतीय न्याय संहिता २०२३ च्या कलम ११८(१), ११५(२), ३५२, ३५१(२), १३१, ३२४(४), ३(५) अन्वये गुन्हा दाखल केला आहे.
एकाच वेळी घडलेल्या या दोन परस्परविरोधी घटनांमुळे गावात तणावाचे वातावरण निर्माण झाले आहे. किरकोळ वाटणाऱ्या बांधकामाच्या वादाने इतके रौद्र रूप धारण केले की त्यात दोन्ही कुटुंबांतील वृद्ध आणि महिलांनाही दुखापतींना सामोरे जावे लागले. या दोन्ही गुन्ह्यांचा अधिक तपास सहाय्यक फौजदार संजय सानप हे वरिष्ठ पोलीस अधिकाऱ्यांच्या मार्गदर्शनाखाली करत आहेत. पोलीस सध्या या प्रकरणातील प्रत्यक्षदर्शींचे जबाब नोंदवत असून परिसरातील शांतता राखण्याचे आवाहन पोलीस प्रशासनाकडून करण्यात आले आहे.
Comments
Post a Comment