रत्नागिरी जिल्ह्यात स्वराज्यरक्षक छत्रपती संभाजी महाराजांना पोलीसांची मानवंदना!
शौर्यपीठावर उमटला इतिहासाचा गौरवशाली हुंकार
संगमेश्वर-रत्नागिरी, दि. १५ (प्रतिनिधी) :- कोकणच्या भूमीतील शौर्याचा आणि बलिदानाचा साक्षीदार असलेल्या संगमेश्वर कसबा येथील छत्रपती संभाजी महाराज स्मारकाच्या परिसरात गुरुवारी एक अपूर्व आणि ऐतिहासिक सोहळा संपन्न झाला. स्वराज्यरक्षक छत्रपती संभाजी महाराज यांच्या ३६९ व्या जयंतीचे औचित्य साधून रत्नागिरी जिल्हा पोलीस दलाच्या वतीने महाराजांच्या स्मृतींना प्रथमच पोलीस बँड पथकाच्या गजरात शासकीय मानवंदना देण्यात आली. या अभूतपूर्व घटनेने केवळ संगमेश्वरच नव्हे तर संपूर्ण रत्नागिरी जिल्ह्याच्या शिरपेचात मानाचा तुरा रोवला असून, शिवशंभूंच्या पराक्रमाला पोलीस दलाने दिलेली ही सलामी जनमानसात कौतुकाचा विषय ठरली आहे.
व्हिडीयो पहा
दिनांक १४ मे २०२६ रोजी सकाळच्या प्रसन्न वातावरणात हा सोहळा पार पडला. रत्नागिरी जिल्हा पोलीस अधीक्षक मा. श्री. नितीन बगाटे (भा.पो.से.) यांच्या प्रमुख उपस्थितीत या कार्यक्रमाचे आयोजन करण्यात आले होते. प्रारंभी श्री. बगाटे यांच्या शुभहस्ते छत्रपती संभाजी महाराजांच्या भव्य स्मारकास पुष्पहार अर्पण करून अभिवादन करण्यात आले. त्यानंतर पोलीस बँड पथकाने अत्यंत शिस्तबद्ध पद्धतीने संचलन करत आणि वाद्यांच्या सुरावलीतून मानवंदना देत महाराजांच्या अतुलनीय शौर्याला सलाम केला. पोलीस बँडच्या या धीरगंभीर सुरावलींनी संपूर्ण परिसर भारावून गेला होता.
रत्नागिरी जिल्ह्याच्या इतिहासामध्ये छत्रपती संभाजी महाराज जयंतीच्या निमित्ताने अशा प्रकारे पोलीस बँडच्या निनादात मानवंदना देण्याची ही पहिलीच वेळ आहे. स्वराज्याचे दुसरे छत्रपती आणि ज्यांच्या बलिदानाने स्वराज्य पुन्हा उभे राहिले, अशा या महान योद्ध्याला पोलीस दलाच्या वतीने सन्मानित करण्यात आल्याने या जयंती उत्सवाला एक वेगळेच गांभीर्य आणि पावित्र्य प्राप्त झाले. यावेळी उपस्थितांना संबोधित करताना पोलीस दलाच्या वतीने सांगण्यात आले की, संभाजी महाराजांचे विचार आणि त्यांचा स्वाभिमानी लढा हा पोलीस दलासाठी आणि सर्व नागरिकांसाठी सदैव प्रेरणादायी आहे.
या ऐतिहासिक प्रसंगी मा. अपर पोलीस अधीक्षक श्री. बी. बी. महामुनी यांच्यासह जिल्ह्यातील वरिष्ठ पोलीस अधिकारी, विविध ठाण्यांचे अंमलदार आणि पोलीस बँड पथकातील कर्मचारी मोठ्या संख्येने उपस्थित होते. केवळ सरकारी अधिकारीच नव्हे, तर स्थानिक नागरिक, शिवप्रेमी आणि संभाजी महाराजांचे अनुयायी यांनीही या सोहळ्याला मोठी गर्दी केली होती. आपल्या लाडक्या राजाला पोलीस दलातर्फे मिळणारा हा सन्मान पाहून अनेक नागरिक भावूक झाले होते. कसब्यातील या स्मारकाच्या ठिकाणी झालेल्या या भव्य कार्यक्रमामुळे परिसरात चैतन्याचे वातावरण निर्माण झाले असून, पोलीस दलाच्या या उपक्रमाचे सर्व स्तरांतून स्वागत होत आहे. शेवटी शिस्तबद्ध मानवंदना आणि महाराजांच्या जयघोषात या कार्यक्रमाची सांगता झाली.
Comments
Post a Comment