सविस्तर बातमी पाहण्यासाठी येथे क्लिक करा...

​ऑनलाईन रमीच्या नादात बनला घरफोडी करणारा चोर!
रायगड स्थानिक गुन्हे अन्वेषण शाखेकडून पाच गुन्ह्यांचा उलगडा
 नागोठणे परिसरात केल्या ५ घरफोड्या! 

रोहा-​रायगड, दि. २० (प्रतिनिधी) :- ऑनलाईन गेमिंग आणि रमीच्या विळख्यात सापडल्यामुळे तरुण पिढी कशा प्रकारे गुन्हेगारी क्षेत्राकडे वळत आहे, याचे एक धक्कादायक उदाहरण रायगड जिल्ह्यात समोर आले आहे. ऑनलाईन रमीमध्ये हरलेले लाखो रुपयांचे कर्ज फेडण्यासाठी घरफोड्या करणाऱ्या एका सराईत गुन्हेगाराला रायगड स्थानिक गुन्हे अन्वेषण शाखेने (LCB) अत्यंत शिताफीने अटक केली आहे. या कारवाईमुळे नागोठणे पोलीस ठाण्याच्या हद्दीतील घरफोडीच्या तब्बल पाच गुन्ह्यांची एकाच वेळी उकल करण्यात पोलिसांना यश आले आहे.

​नागोठणे पोलीस ठाणे येथे भारतीय न्याय संहिता कायदा २०२३ च्या कलम ३०५ नुसार दाखल असलेल्या गुन्ह्याचा समांतर तपास स्थानिक गुन्हे अन्वेषण शाखेकडून सुरू होता. या तपासादरम्यान पोलीस हवालदार अमोल हंबीर आणि पोलीस कॉन्स्टेबल ईश्वर लांबोटे यांना आपल्या गोपनीय बातमीदारांमार्फत एका संशयित व्यक्तीबाबत खात्रीशीर माहिती प्राप्त झाली. मिळालेल्या माहितीच्या आधारे तपास पथकाने तांत्रिक विश्लेषण (Technical Analysis) केले आणि संशयित आरोपी आदित्य अमृत कुथे (वय २३ वर्षे, रा. मुंढाणी, पोस्ट बेनसे, ता. पेण, जि. रायगड) याला ताब्यात घेतले.

​पोलिसी खाक्या दाखवताच संशयित आरोपीने पोपटासारखे बोलण्यास सुरुवात केली. त्याने दिलेल्या कबुलीनुसार, त्याला ऑनलाईन रमी खेळण्याचे प्रचंड व्यसन जडले होते. या खेळात तो मोठ्या प्रमाणात पैसे हरला होता आणि त्याच्यावर कर्जाचा डोंगर उभा राहिला होता. हे कर्ज फेडण्यासाठी दुसरा कोणताही मार्ग नसल्याने त्याने घरफोड्या करण्याचा मार्ग निवडला. आरोपीने नागोठणे पोलीस ठाण्याच्या हद्दीत २०२४ पासून ते २०२६ पर्यंत एकूण पाच वेगवेगळ्या ठिकाणी घरफोड्या केल्याची कबुली दिली आहे. यामध्ये सन २०२४ मधील दोन, २०२५ मधील दोन आणि २०२६ मधील एका ताज्या गुन्ह्याचा समावेश आहे.

​या कारवाईमुळे नागोठणे पोलीस ठाण्यातील गुन्हा रजिस्टर नंबर २७/२०२६, ६६/२०२५, ९६/२०२५, ११६/२०२४ आणि १६६/२०२४ अशा पाचही गुन्ह्यांमधील गुंतागुंत सुटली आहे. अटक करण्यात आलेल्या आरोपीला पुढील कायदेशीर प्रक्रियेसाठी नागोठणे पोलिसांच्या स्वाधीन करण्यात आले असून, त्याने चोरलेला मुद्देमाल हस्तगत करण्याची प्रक्रिया आता पोलीस राबवणार आहेत.

​सदरची यशस्वी कारवाई रायगड जिल्ह्याच्या पोलीस अधीक्षक आंचल दलाल, अप्पर पोलीस अधीक्षक अभिजीत शिवथरे आणि स्थानिक गुन्हे अन्वेषण विभागाचे वरिष्ठ पोलीस निरीक्षक मिलिंद खोपडे यांच्या मार्गदर्शनाखाली करण्यात आली. या तपास पथकामध्ये सहाय्यक पोलीस निरीक्षक मानसिंग पाटील, पोलीस हवालदार सुधीर मोरे, प्रतीक सावंत, अमोल हंबीर, शरद फरांदे, रणजित खराडे आणि पोलीस शिपाई ईश्वर लांबोटे व प्रदीप खरात यांचा समावेश होता. या कारवाईमुळे परिसरात पोलिसांचे कौतुक होत असून ऑनलाईन गेमिंगच्या आहारी गेलेल्या तरुणांच्या पालकांमध्ये चिंतेचे वातावरण पसरले आहे.