अलिबाग-पोयनाड मार्गावर रुग्णवाहिकेच्या धडकेत महिलेचा मृत्यू
पोयनाड, दि. १ (प्रतिनिधी) :- अलिबाग-पोयनाड रस्त्यावरील पेझारी चेकपोस्टजवळ झालेल्या अपघातात एका महिलेचा दुर्दैवी मृत्यू झाला आहे. ही घटना पेझारी येथील पेट्रोल पंपासमोर घडली.
मिळालेल्या माहितीनुसार, एम एच -१४ सी एल ०५२४ क्रमांकाची रुग्णवाहिका पोयनाडकडून अलिबागच्या दिशेने भरधाव वेगात जात होती. यावेळी या रुग्णवाहिकेच्या चालकाने रस्त्याच्या परिस्थितीकडे पूर्णपणे दुर्लक्ष करून वाहन चालवले. त्याच दरम्यान, पेझारी येथे राहणारी एक महिला रस्त्यावरून चालत असताना, समोरून येणाऱ्या वाहनांचा अंदाज न घेता आणि कोणतीही खबरदारी न बाळगता अचानक रुग्णवाहिकेसमोर आली. रुग्णवाहिकेचा वेग जास्त असल्याने चालकाला वेळीच नियंत्रण मिळवता आले नाही, परिणामी रुग्णवाहिकेने महिलेला समोरून जोरदार धडक दिली.
ही धडक इतकी भीषण होती की, सदर महिलेच्या चेहऱ्याला, हाताला आणि पायाला गंभीर दुखापत झाली. अपघातानंतर तिला तातडीने उपचारासाठी हलवण्यात आले, मात्र जखमा गंभीर असल्याने उपचारादरम्यान तिचा मृत्यू झाला. या प्रकरणाचा प्राथमिक तपास केल्यानंतर, हा अपघात केवळ चालकाच्या चुकीमुळे झाला नसून मयत महिलेने दाखवलेला निष्काळजीपणाही तितकाच कारणीभूत असल्याचे पोलीसांच्या निदर्शनास आले. रस्त्यावरून चालताना योग्य ती काळजी न घेतल्याने महिला अपघातास कारणीभूत ठरली, तर रुग्णवाहिका चालकाने वेगावर नियंत्रण न ठेवल्याने ही दुर्घटना घडली.
याप्रकरणी पोयनाड पोलीस ठाण्यात गुन्हा रजिस्टर क्रमांक ३६/२०२६ नुसार भारतीय न्याय संहिता कलम १०६(१), १२५(ब), २८१ आणि मोटार वाहन अधिनियम १९८८ च्या कलम १८४ अन्वये दोन्ही बाजूंच्या निष्काळजीपणाबद्दल गुन्हा दाखल करण्यात आला आहे. या घटनेचा पुढील अधिक तपास पोलीस उपनिरीक्षक राजेंद्र म्हात्रे हे करीत आहेत.
Comments
Post a Comment