गतीरोधकावर दुचाकी घसरून भीषण अपघात; खारापटी येथील तरुणाचा मृत्यू
नागोठणे येथील जैन कॉलेजसमोरील मुख्य रस्त्यावर अपघात
नागोठणे, दि. ४ (प्रतिनिधी) :- नागोठणे पोलीस ठाण्याच्या हद्दीत जैन कॉलेजसमोरील मुख्य रस्त्यावर शुक्रवारी सायंकाळच्या सुमारास एक अत्यंत दुर्दैवी अपघात घडला. या अपघातात दुचाकी गतीरोधकावरून घसरल्याने झालेल्या गंभीर दुखापतीमुळे एका ३९ वर्षीय तरुणाला आपला जीव गमवावा लागला आहे. शनिकुमार परशुराम पोकळे (राहणार खारापटी, पो. मेढा, ता. रोहा) असे या मृत व्यक्तीचे नाव आहे.
मिळालेल्या सविस्तर माहितीनुसार, ३ एप्रिल २०२६ रोजी सायंकाळी ६:१५ वाजण्याच्या सुमारास शनिकुमार हे आपल्या ताब्यातील 'हिरो एक्स्टींम' मोटारसायकलवरून (क्रमांक एम एच ०६/सी डब्ल्यु १५३७) नागोठणे येथून खारापटीच्या दिशेने घरी परतत होते. प्रवास सुरू असताना मौजे नागोठणे येथील जैन कॉलेजसमोर असलेल्या गतीरोधकाचा त्यांना अंदाज आला नाही किंवा वेगामुळे त्यांची दुचाकी त्या गतीरोधकावरून अचानक स्लीप झाली. या भीषण अपघातात शनिकुमार हे रस्त्यावर जोरात फेकले गेले आणि त्यांच्या डोक्याला अत्यंत गंभीर दुखापत झाली. अपघातानंतर त्यांना तातडीने वैद्यकीय मदत मिळवून देण्याचा प्रयत्न करण्यात आला, मात्र उपचारापूर्वीच त्यांची प्राणज्योत मालवली.
या घटनेची माहिती मिळताच नागोठणे पोलीसांनी घटनास्थळी धाव घेतली. या प्रकरणी नागोठणे पोलीस ठाण्यात गुन्हा रजिस्टर क्रमांक ७२/२०२६ नुसार भारतीय न्याय संहिता २०२३ चे कलम १०६(१), २८१, १२५(a), १२५(b) आणि मोटार वाहन अधिनियम १९८८ च्या कलम १८४ अन्वये गुन्हा दाखल करण्यात आला आहे. सध्या या अपघाताचा पुढील सखोल तपास पोलीस हवालदार म्हात्रे यांच्याकडून केला जात आहे. ऐन विशी-तिशीतील कर्त्या पुरुषाचा अशा प्रकारे अपघाती मृत्यू झाल्याने खारापटी परिसरात हळहळ व्यक्त केली जात आहे.
Comments
Post a Comment