मुरुडमध्ये महिलेला सिमेंटच्या स्टमने बेदम मारहाण
प्रेमप्रकरणाच्या संशयावरून मजगाव कोळीवाड्यात राडा
मुरुड जंजिरा, दि. १० (प्रतिनिधी) :- मुरुड तालुक्यातील मजगाव कोळीवाडा परिसरात एका महिलेला प्रेमप्रकरणाच्या संशयावरून अमानुषपणे मारहाण करण्यात आल्याची धक्कादायक घटना उघडकीस आली आहे. आपल्या भावाचे आरोपीच्या मुलीसोबत प्रेमसंबंध असल्याच्या संशयावरून एका अज्ञात इसमाने महिलेवर भररस्त्यात हल्ला चढवला. या हल्ल्यात पीडित महिला गंभीर जखमी झाली असून, याप्रकरणी मुरुड पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, ही घटना ८ एप्रिल २०२६ च्या रात्री ८ वाजेपासून ९ एप्रिल २०२६ च्या रात्री ८ वाजेच्या दरम्यान घडली. विहुर येथील रहिवासी असलेली महिला फिर्यादी ही मजगाव बसस्टॉप येथे आपल्या भावासोबत बोलत उभी होती. त्यानंतर ते दोघेही बोलत मजगाव कोळीवाडा परिसराच्या दिशेने चालत निघाले होते. यावेळी वाटेत एका अज्ञात इसमाने त्यांना अडवले. आरोपीने फिर्यादी महिलेला अडवून थेट प्रश्न विचारला की, "तुझ्या भावाचे आणि माझ्या मुलीचे काही प्रेमप्रकरण सुरू आहे का?" या अचानक विचारलेल्या प्रश्नावर महिलेने आपल्याला या संदर्भात कोणतीही माहिती नसल्याचे स्पष्टपणे सांगितले.
परंतु, 'मला काही माहीत नाही' असे उत्तर ऐकताच आरोपीचा राग अनावर झाला. त्याने भररस्त्यात महिलेला अर्वाच्य भाषेत शिवीगाळ करण्यास सुरुवात केली. वादाचे रूपांतर लवकरच शारीरिक हिंसाचारात झाले. आरोपीने प्रथम महिलेला हाताबुक्क्यांनी बेदम मारहाण केली. एवढ्यावरच न थांबता, रागाच्या भरात त्याने जवळच पडलेला सिमेंटचा एक तुटलेला स्टम उचलला आणि तो जोरात फिर्यादी महिलेच्या डोक्यात मारला. या जीवघेण्या हल्ल्यात महिलेच्या डोक्याला गंभीर दुखापत झाली असून ती रक्तबंबाळ झाली.
या घटनेनंतर परिसरात खळबळ उडाली असून पीडित महिलेने मुरुड पोलीस ठाण्यात धाव घेऊन तक्रार नोंदवली आहे. पोलिसांनी या घटनेचे गांभीर्य ओळखून अज्ञात आरोपीविरुद्ध मुरुड पोलीस ठाणे गुन्हा रजिस्टर नंबर ६१/२०२६ नुसार भारतीय न्याय संहिता २०२३ चे कलम ११८(१), ११५(२), ३५१(२) आणि ३५२ अन्वये गुन्हा दाखल केला आहे. या प्रकरणाचा अधिक तपास पोलीस हवालदार दसाडे हे करत असून, फरार आरोपीचा शोध घेण्यासाठी पोलिसांनी तपासाची चक्रे वेगवान केली आहेत. भररस्त्यात महिलेवर झालेल्या या हल्ल्यामुळे परिसरात संताप व्यक्त होत आहे.
Comments
Post a Comment