अलिबागमध्ये व्हॉट्सॲपवरून महिलेचा छळ
सोगावच्या तरुणावर विनयभंगाचा गुन्हा दाखल
अलिबाग, दि. १३ (प्रतिनिधी) :- सोशल मीडियाचा गैरवापर करून एका महिलेचा वारंवार पाठलाग करणे आणि तिला अश्लील स्वरूपाचे मेसेज पाठवून तिचा विनयभंग केल्याची धक्कादायक घटना अलिबागमध्ये उघडकीस आली आहे. याप्रकरणी अलिबाग पोलीस ठाण्यात संबंधित आरोपीविरुद्ध भारतीय न्याय संहितेच्या नवीन कलमान्वये गुन्हा दाखल करण्यात आला असून पोलीस या प्रकरणाचा सखोल तपास करत आहेत.
मिळालेल्या माहितीनुसार, अलिबाग पोलीस ठाण्याच्या हद्दीत राहणाऱ्या एका महिलेने या संदर्भात फिर्याद दिली आहे. फिर्यादी महिला आपल्या घरी असताना, सोगाव (पो. मापगाव) येथील रहिवासी असलेल्या एका तरुणाने तिला सातत्याने मानसिक त्रास देण्यास सुरुवात केली होती. हा प्रकार ९ नोव्हेंबर २०२५ रोजी सकाळी १०:५१ वाजल्यापासून सुरू झाला तो थेट १२ एप्रिल २०२६ च्या मध्यरात्रीपर्यंत सुरूच होता. आरोपीने गेल्या पाच-सहा महिन्यांच्या कालावधीत फिर्यादीच्या मोबाईलवर व्हॉट्सॲपच्या माध्यमातून वारंवार मेसेज पाठवून तिला त्रास दिला.
आरोपी एवढ्यावरच थांबला नाही, तर त्याने संबंधित महिलेशी जवळीक साधण्याचा प्रयत्न केला आणि तिचा छुपा पाठलाग (Stalking) करण्यास सुरुवात केली. वेळोवेळी व्हॉट्सॲप कॉल करून "तू मला आवडतेस" असे म्हणत त्याने महिलेच्या मनास लज्जा उत्पन्न होईल असे वर्तन केले. फिर्यादीने वारंवार दुर्लक्ष करूनही आरोपीचा त्रास वाढतच गेल्याने अखेर पीडित महिलेने अलिबाग पोलीस ठाण्यात धाव घेऊन तक्रार नोंदवली.
या तक्रारीची गंभीर दखल घेत अलिबाग पोलिसांनी आरोपीविरुद्ध गुन्हा रजिस्टर नंबर ४१/२०२६ नुसार, भारतीय न्याय संहिता २०२३ चे कलम ७८(२) (विनयभंग आणि पाठलाग करणे) अंतर्गत गुन्हा दाखल केला आहे. कायद्यातील नवीन तरतुदींनुसार या प्रकरणाचा तपास आता युद्धपातळीवर सुरू झाला असून, महिला पोलीस उपनिरीक्षक दडस या प्रकरणाचा अधिक तपास करत आहेत. डिजिटल पुराव्यांच्या आधारे पोलीस आता पुढील कायदेशीर कारवाईची तयारी करत आहेत. अलिबाग परिसरात या घटनेमुळे खळबळ उडाली असून महिलांच्या सुरक्षिततेचा प्रश्न पुन्हा एकदा ऐरणीवर आला आहे.
Comments
Post a Comment