खोपोलीत उभ्या ट्रकच्या डिझेलची चोरी!
सारसनफाटा येथील पेट्रोलपंपाजवळील घटना
खोपोली, दि. १४ (प्रतिनिधी) :- खालापूर तालुक्यातील खोपोली पोलीस ठाण्याच्या हद्दीत एका उभ्या ट्रकच्या डिझेलची चोरी झाल्याची धक्कादायक घटना उघडकीस आली आहे. ही घटना मध्यरात्री दीड वाजेच्या सुमारास मौजे खोपोली येथील सारसनफाटा परिसरातील राम पेट्रोलपंपाच्या जवळ घडली. याप्रकरणी अज्ञात चोरट्यांविरुद्ध खोपोली पोलीस ठाण्यात गुन्हा दाखल करण्यात आला असून पोलीस आता या प्रकरणाचा अधिक तपास करत आहेत.
मिळालेल्या माहितीनुसार, या प्रकरणातील फिर्यादी हे कर्नाटक राज्यातील बेळगाव (बेशगावी) जिल्ह्यातील अथणी तालुक्यातील बन्नूर येथील रहिवासी आहेत. फिर्यादी आपल्या ताब्यातील ट्रक क्रमांक एमएच ४३/सी.ई. ९५०२ घेऊन जात असताना, त्यांनी विश्रांतीसाठी आपला ट्रक खोपोली येथील सारसनफाटा परिसरात असलेल्या राम पेट्रोलपंपाच्या बाजूला सुरक्षित ठिकाणी उभा केला होता. रात्रीच्या वेळी फिर्यादी हे ट्रकच्या केबिनमध्ये झोपले असताना, चोरट्यांनी संधी साधून ट्रकच्या डिझेल टाकीचा लॉक तोडला.
कोणीतरी अज्ञात इसमाने स्वतःच्या आर्थिक फायद्यासाठी आणि लबाडीच्या हेतूने फिर्यादी यांच्या संमतीशिवाय ट्रकच्या टाकीतून एकूण २५,५७३ रुपये किमतीचे डिझेल काढून नेले. ही चोरी इतक्या शिताफीने करण्यात आली की, फिर्यादी केबिनमध्ये झोपलेले असतानाही त्यांना या प्रकाराचा थांगपत्ता लागला नाही. सकाळी उठल्यानंतर टाकीचे लॉक तुटलेले दिसल्याने हा चोरीचा प्रकार समोर आला.
या चोरीच्या घटनेबाबत फिर्यादी यांनी खोपोली पोलीस ठाण्यात तक्रार दाखल केली आहे. त्यानुसार पोलिसांनी भारतीय न्याय संहिता (BNS) २०२३ च्या कलम ३०३(२) अन्वये गुन्हा रजिस्टर क्रमांक १३०/२०२६ नुसार अज्ञात व्यक्तीविरुद्ध गुन्हा नोंदवला आहे. या प्रकरणाचा पुढील तपास पोलीस हवालदार दबडे यांच्याकडे सोपवण्यात आला असून, परिसरातील सीसीटीव्ही फुटेज आणि इतर तांत्रिक बाबींच्या आधारे चोरट्यांचा शोध घेण्याचे काम सुरू आहे. हायवेवर उभ्या राहणाऱ्या गाड्यांच्या डिझेल चोरीच्या वाढत्या घटनांमुळे चालक वर्गात भीतीचे वातावरण पसरले आहे.
Comments
Post a Comment