पत्नीसोबत प्रेमसंबंधाच्या संशयावरून तरुणावर लाकडी दांडक्याने जीवघेणा हल्ला
नेरळ पोलिसांत गुन्हा दाखल
अलिबाग-रायगड, दि. ५ (प्रतिनिधी) :- कर्जत तालुक्यातील चिंचवाडी येथे एका तरुणाने आपल्या पत्नीसोबत प्रेमसंबंध असल्याच्या संशयावरून दुसऱ्या एका तरुणावर लाकडी दांडक्याने भीषण हल्ला केल्याची धक्कादायक घटना उघडकीस आली आहे. याप्रकरणी नेरळ पोलीस ठाण्यात आरोपीविरुद्ध गुन्हा दाखल करण्यात आला असून पोलीस अधिक तपास करत आहेत.
मिळालेल्या माहितीनुसार, मौजे चिंचवाडी, पोस्ट पोशिर (ता. कर्जत) येथील फिर्यादी हे ३ एप्रिल २०२६ रोजी रात्री ८:०० वाजण्याच्या सुमारास आपल्या पत्नीसह गावातील माळरानावर असलेल्या झोपडीत गेले होते. आपल्या कोंबड्यांची राखण करण्यासाठी ते तिथे थांबले असताना, त्याच गावातील आरोपी त्या ठिकाणी पोहोचला. आरोपीच्या मनात फिर्यादी आणि स्वतःच्या पत्नीच्या प्रेमसंबंधांबाबत संशय होता. याच रागातून आरोपीने फिर्यादीशी वाद घालण्यास सुरुवात केली.
वादाचे रूपांतर लवकरच हाणामारीत झाले. संतापलेल्या आरोपीने आपल्या हातातील लाकडी दांडक्याने फिर्यादीवर प्रहार करण्यास सुरुवात केली. या हल्ल्यात फिर्यादीला गंभीर दुखापत झाली आहे. तसेच, यावेळी भांडण सोडवण्यासाठी मध्यस्थी करणाऱ्या साक्षीदारांनाही आरोपीने हाताने आणि बुक्क्यांनी बेदम मारहाण केली. या घटनेमुळे परिसरात एकच खळबळ उडाली असून भीतीचे वातावरण निर्माण झाले आहे.
या घटनेनंतर पीडित फिर्यादीने नेरळ पोलीस ठाण्यात धाव घेऊन तक्रार नोंदवली आहे. पोलिसांनी या तक्रारीची गंभीर दखल घेत आरोपीविरुद्ध नेरळ पोलीस ठाणे गुन्हे रजिस्टर क्रमांक ६७/२०२६ नुसार, भारतीय न्याय संहिता २०२३ चे कलम ११८(१) आणि ११५(२) अन्वये गुन्हा दाखल केला आहे. या प्रकरणाचा पुढील सविस्तर तपास श्रेणी पोलीस उपनिरीक्षक श्री. रायसिंग लालजी वसावे हे करत असून, आरोपीवर कडक कायदेशीर कारवाई करण्याची प्रक्रिया सुरू आहे.
Comments
Post a Comment