मुंबई-पुणे महामार्गावर टँकरची उभ्या टेम्पोला धडक
रसायनी पोलीस ठाण्यात गुन्हा दाखल
रसायनी, दि. २४ (प्रतिनिधी) :- मुंबई-पुणे महामार्गावर खालापूर हद्दीत एका भरधाव टँकरचालकाने रस्त्याच्या कडेला उभ्या असलेल्या आयशर टेम्पोला पाठीमागून जोरदार धडक दिल्याची घटना २२ मार्च २०२६ रोजी मध्यरात्री घडली. या अपघातात दोन्ही वाहनांचे मोठ्या प्रमाणावर नुकसान झाले असून, याप्रकरणी रसायनी पोलीस ठाण्यात टँकरचालकाविरुद्ध गुन्हा दाखल करण्यात आला आहे.
मिळालेल्या माहितीनुसार, सदर अपघात रविवारी दीड वाजण्याच्या सुमारास मौजे रिस गावच्या हद्दीत मुंबई-पुणे लेनवर १८ किमी अंतरावर झाला. फिर्यादी यांचा आयशर टेम्पो (क्रमांक एम एच ४६ सी इ ८६८२) हा तांत्रिक बिघाडामुळे बंद पडला होता. त्यामुळे चालकाने सुरक्षेच्या दृष्टीने आपला टेम्पो रस्त्याच्या बाजूला उभा केला होता. याच दरम्यान महापे, ता. पनवेल येथील रहिवासी असलेला आरोपी चालक आपल्या ताब्यातील अशोक लेलँड कंपनीचा टँकर (क्रमांक एम एच ०४ के यू ७९१२) घेऊन जात होता.
अपघाताच्या वेळी टँकरचा वेग अधिक होता आणि चालकाचे रस्त्याच्या परिस्थितीकडे पूर्णतः दुर्लक्ष झाले होते. अतिवेगाने आणि बेदरकारपणे टँकर चालवत असताना चालकाने उभ्या असलेल्या आयशर टेम्पोला पाठीमागून भीषण धडक दिली. ही धडक इतकी जोरदार होती की, दोन्ही वाहनांच्या दर्शनी व मागील भागाचे मोठे नुकसान झाले. सुदैवाने या घटनेत कोणतीही जीवितहानी झाल्याचे प्राथमिक माहितीवरून समोर आलेले नाही, मात्र मालमत्तेचे नुकसान झाले आहे.
या प्रकरणी फिर्यादी यांनी दिलेल्या तक्रारीवरून रसायनी पोलिसांनी आरोपी टँकरचालकाविरुद्ध गुन्हा रजिस्टर क्रमांक ४५/२०२६ नुसार भारतीय न्याय संहिता कलम २८१ आणि मोटार वाहन अधिनियम १९८८ च्या कलम १८४ अन्वये गुन्हा दाखल केला आहे. रस्त्यावर वाहन चालवताना दाखवलेला निष्काळजीपणा आणि इतर प्रवाशांच्या जीवितास धोका निर्माण केल्याचा ठपका चालकावर ठेवण्यात आला आहे. या घटनेचा पुढील अधिक तपास रसायनी पोलीस ठाण्याचे पोलीस हवालदार पवार हे करीत आहेत.
Comments
Post a Comment