माणगांव तालुक्यात कर्ज मिळवून देण्याच्या नावाखाली फसवणुक करणारे रॅकेट सक्रीय!
आगाऊ पैसे, प्रोसेसिंग फी आणि खोट्या आश्वासनांना बळी पडू नका; कागदपत्रे व बँक माहिती कोणत्याही व्यक्तींना देणे टाळा नागरिकांना सतर्क राहण्याचे आवाहन
माणगांव-रायगड, दि. २७ (प्रमोद जाधव) :- सध्या माणगांव तालुक्यामध्ये अत्यंत कमी व्याजदरात, तातडीने आणि कोणत्याही प्रकारच्या जामीनदाराशिवाय किंवा हमीशिवाय कर्ज मिळवून देण्याचे खोटे आमिष दाखवून सर्वसामान्य नागरिकांची फसवणूक करण्याचे प्रकार मोठ्या प्रमाणावर वाढल्याची धक्कादायक माहिती समोर येत आहे. काही भामटे स्वतःला नामांकित बँक, वित्तीय संस्था किंवा नामांकित खासगी फायनान्स कंपनीचे अधिकृत प्रतिनिधी असल्याचे भासवून नागरिकांशी थेट मोबाईल फोन, व्हॉट्सॲप, फेसबुक आणि इतर विविध सोशल मीडिया माध्यमांद्वारे संपर्क साधत आहेत. या संपर्कादरम्यान "तुमचे कर्ज मंजूर झाले आहे", "कर्ज मिळवण्यासाठी फक्त सुरुवातीला प्रोसेसिंग फी भरावे लागेल", "विमा रक्कम जमा करा" किंवा "फाईल चार्ज भरल्यानंतर तात्काळ कर्जाची संपूर्ण रक्कम तुमच्या बँक खात्यात जमा होईल" अशा वेगवेगळ्या प्रकारच्या भूलथापा मारून नागरिकांना जाळ्यात ओढले जात आहे. एकदा का नागरिकांनी या आमिषांना बळी पडून त्यांनी सांगितलेली आगाऊ रक्कम संबंधित खात्यावर जमा केली, की त्यानंतर ते भामटे आपले मोबाईल फोन बंद करून टाकतात, सर्व प्रकारचे संपर्क तोडतात किंवा काही प्रकरणांमध्ये आणखी पैशांची मागणी करून नागरिकांना मानसिक आणि आर्थिक त्रासात ढकलतात.
विशेष चिंतेची बाब म्हणजे, हे भामटे नागरिकांचा विश्वास संपादन करण्यासाठी अत्यंत चपळाईने बनावट ओळखपत्रे, खोटे कर्ज मंजुरीपत्र (सॅंक्शन लेटर), बँकांच्या बनावट वेबसाईट आणि अगदी हुबेहूब दिसणारे अधिकृत लोगो वापरत असल्याने नागरिक सहजपणे त्यांच्या फसवणुकीला बळी पडत आहेत. या पार्श्वभूमीवर नागरिकांनी कोणत्याही अनोळखी व्यक्तीने दिलेल्या अशा आश्वासनांवर किंवा संदेशांवर डोळे झाकून अजिबात विश्वास ठेवू नये. कर्जाच्या प्रक्रियेसाठी कोणत्याही व्यक्तीच्या वैयक्तिक बँक खात्यावर पैसे जमा करण्याची चूक करू नये, तसेच आपले ओळखपत्र, पॅन कार्ड, एटीएम कार्ड, बँकेचा ओटीपी, यूपीआय पिन, सीव्हीव्ही क्रमांक किंवा नेट बँकिंगची कोणतीही गोपनीय माहिती अनोळखी व्यक्तींना देणे पूर्णपणे टाळावे. कोणत्याही प्रकारची रक्कम भरण्यापूर्वी संबंधित बँक किंवा वित्तीय संस्थेच्या अधिकृत शाखेत स्वतः जाऊन संपूर्ण माहितीची प्रत्यक्ष खातरजमा करणे अत्यंत आवश्यक आहे. सोशल मीडियावरील आकर्षक जाहिराती, संशयास्पद वाटणाऱ्या लिंक्स, अनोळखी कर्ज देणारे मोबाईल ॲप्स किंवा कर्ज मंजुरीचे वैयक्तिक संदेश याबाबत नागरिकांनी विशेष सतर्कता बाळगायला हवी. जर कोणालाही असा संशयास्पद व्यवहार किंवा फसवणुकीचा प्रयत्न झाल्याचे आढळल्यास, त्यांनी अजिबात वेळ न दवडता तात्काळ जवळच्या पोलीस ठाण्यात अधिकृत तक्रार नोंदवावी आणि आपल्या बँकेलाही याची कल्पना द्यावी, कारण थोडीशी सावधगिरी आणि अधिकृत माहितीची खातरजमा केल्यास मोठी आर्थिक फसवणूक सहज टाळता येऊ शकते, असा मोलाचा सल्ला स्थानिक प्रशासन आणि सायबर तज्ज्ञांकडून दिला जात असून नागरिकांनी स्वतः जागरूक राहण्यासोबतच आपल्या कुटुंबीयांना आणि मित्रपरिवारालाही याबाबत सतर्क करावे, असे आवाहन करण्यात आले आहे.
Comments
Post a Comment