रत्नागिरीत देशातील पहिल्या 'स्वॅम्प पोलीस' गस्त उपक्रमाचा थाटात शुभारंभ
पालकमंत्री उदय सामंत यांच्या हस्ते उद्घाटन
रत्नागिरी, दि. ११ (प्रतिनिधी) :- रत्नागिरी जिल्ह्याच्या किनारपट्टीवरील सुरक्षेला अधिक बळकटी देण्यासाठी आणि कांदळवनांसारख्या दुर्गम भागात चोख बंदोबस्त ठेवण्यासाठी रत्नागिरी पोलीस दलाने एक महत्त्वपूर्ण पाऊल उचलले आहे. 'स्वॅम्प पोलीस' (Swamp Police) या भारतात पहिल्यांदाच प्रायोगिक तत्त्वावर राबविण्यात येणाऱ्या अभिनव गस्त उपक्रमाचे औपचारिक उद्घाटन राज्याचे उद्योग तथा रत्नागिरी जिल्ह्याचे पालकमंत्री डॉ. उदय सामंत यांच्या हस्ते उत्साहात संपन्न झाले. नाचणे येथील नारायणमळी भागातील कांदळवन परिसरात श्रीफळ वाढवून आणि आकाशात फुगे सोडून या उपक्रमाचा प्रारंभ करण्यात आला.
या ऐतिहासिक प्रसंगी जिल्हा पोलीस अधीक्षक नितीन बगाटे, एनएसजी कमांडर गुरुविंदरसिंग, जिल्हा परिषद सदस्य प्रकाश रसाळ आणि सरपंच भैया भोंगळे यांच्यासह पोलीस दलातील वरिष्ठ अधिकारी आणि स्थानिक लोकप्रतिनिधी मोठ्या संख्येने उपस्थित होते. या उपक्रमाद्वारे दुर्गम खाडी आणि दलदलीच्या भागात पोलिसांची पोहोच वाढणार असून, सुरक्षेच्या दृष्टीने हा मैलाचा दगड ठरणार आहे.
कार्यक्रमाला संबोधित करताना पालकमंत्री डॉ. उदय सामंत यांनी पोलीस अधीक्षक नितीन बगाटे आणि त्यांच्या संपूर्ण पथकाचे विशेष कौतुक केले. ते म्हणाले की, देशातील अशा प्रकारचे हे पहिलेच केंद्र रत्नागिरीत सुरू होत आहे, ही जिल्ह्यासाठी अभिमानास्पद बाब आहे. रत्नागिरीला लाभलेला विस्तीर्ण समुद्रकिनारा आणि नैसर्गिक विविधता लक्षात घेता, भविष्यात पर्यटनाची वृद्धी आणि जिल्ह्याचे संरक्षण या दोन्ही आघाड्यांवर पोलीस दल अशाच प्रकारचे नवनवीन उपक्रम राबवेल, अशी मला खात्री आहे. याकामी शासन स्तरावरून सर्व प्रकारचे सहकार्य आणि आवश्यक निधी उपलब्ध करून दिला जाईल, असे आश्वासनही त्यांनी यावेळी दिले.
रत्नागिरी जिल्ह्याला सुमारे १६७ किलोमीटरचा विस्तीर्ण समुद्रकिनारा लाभला आहे. मात्र, केवळ किनाराच नव्हे, तर अनेक ठिकाणी खोलवर गेलेले खाडीकिनारे, घनदाट कांदळवने (मँग्रोव्हज) आणि चिखलाचे दलदलीचे भाग आहेत. हे भाग अत्यंत संवेदनशील मानले जातात, कारण अशा ठिकाणी पारंपरिक बोटी किंवा गस्त घालणारी वाहने नेणे अशक्य असते. या भौगोलिक अडचणीचा फायदा समाजकंटकांकडून घेतला जाण्याची शक्यता असते, तसेच या भागात दुर्घटना घडल्यास मदतकार्य पोहोचवणे कठीण होते. या आव्हानावर मात करण्यासाठी 'कायकिंग'चा (Kayak Boat) वापर करण्याचा निर्णय पोलीस प्रशासनाने घेतला आहे.
'स्वॅम्प पोलीस' पथकातील जवान आता कायक बोटींच्या माध्यमातून अशा अरुंद आणि दलदलीच्या भागात गस्त घालणार आहेत. या बोटी वजनाने हलक्या आणि हाताळण्यास सोप्या असल्याने चिखलात किंवा कमी पाण्याच्या भागातही अत्यंत वेगाने हालचाल करू शकतात. यामुळे खाडी परिसरात कोणतीही संशयास्पद हालचाल आढळल्यास किंवा आपत्कालीन परिस्थिती उद्भवल्यास पोलीस दलाला तातडीने प्रतिसाद देणे शक्य होईल. केवळ गुन्हेगारी रोखण्यासाठीच नव्हे, तर पर्यावरणाचे रक्षण आणि पर्यटकांच्या सुरक्षिततेसाठीही हा उपक्रम अत्यंत महत्त्वाचा ठरणार आहे. रत्नागिरीतील हा प्रयोग यशस्वी झाल्यास, भविष्यात महाराष्ट्रातील इतर किनारपट्टीवरील जिल्ह्यांसाठी हा एक आदर्श वस्तुपाठ ठरेल, असा विश्वास प्रशासनाकडून व्यक्त केला जात आहे.
Comments
Post a Comment