रत्नागिरी पोलिसांची दमदार वाटचाल; गुन्हे आढावा बैठकीत गुणवंत अधिकाऱ्यांचा गौरव
कर्तव्यदक्षतेचा सन्मान! पोलीस अधीक्षक नितीन बगाटे यांचा रत्नागिरी पोलीस दलातर्फे गौरव
रत्नागिरी, दि. ९ (प्रतिनिधी) :- रत्नागिरी जिल्हा पोलीस दलाच्या शिरपेचात मानाचा तुरा रोवला गेला असून, राज्य शासनाच्या १५० दिवसांच्या ई-गव्हर्नन्स सुधारणा कार्यक्रमांतर्गत जिल्ह्याने संपूर्ण महाराष्ट्र राज्यात प्रथमच पाचवा क्रमांक प्राप्त केला आहे. या दैदीप्यमान यशाबद्दल आणि जिल्ह्याच्या पोलीस प्रशासनात आणलेल्या गतिमानतेबद्दल जिल्हा पोलीस अधीक्षक श्री. नितीन बगाटे यांचा विशेष सन्मान करण्यात आला.
दिनांक ०७ एप्रिल २०२६ रोजी पोलीस अधीक्षक कार्यालय, रत्नागिरी येथे आयोजित करण्यात आलेल्या मासिक गुन्हे आढावा बैठकीदरम्यान हा सोहळा पार पडला. बैठकीच्या सुरुवातीला जिल्ह्यातील कायदा व सुव्यवस्थेचा आढावा घेण्यात आला, ज्यामध्ये प्रलंबित गुन्ह्यांची निर्गती आणि गुन्हेगारी रोखण्यासाठी करण्यात आलेल्या उपाययोजनांवर सविस्तर चर्चा करण्यात आली. याच बैठकीचे औचित्य साधून जिल्ह्यात गेल्या काही काळात उत्कृष्ट कामगिरी करणाऱ्या पोलीस अधिकारी आणि अंमलदारांच्या पाठीवर कौतुकाची थाप देण्यात आली. कर्तव्यदक्षता, गुन्ह्यांची उकल आणि सामाजिक शांतता राखण्यासाठी मोलाचे योगदान देणाऱ्या या पोलीस कर्मचाऱ्यांचा मा. पोलीस अधीक्षक श्री. नितीन बगाटे आणि मा. अपर पोलीस अधीक्षक श्री. बी. बी. महामुनी यांच्या शुभहस्ते प्रशस्तीपत्र देऊन गौरव करण्यात आला.
कार्यक्रमातील मुख्य आकर्षण ठरले ते म्हणजे रत्नागिरी पोलिसांनी ई-गव्हर्नन्स क्षेत्रात मिळवलेले यश. राज्य शासनाने राबवलेल्या १५० दिवसांच्या विशेष सुधारणा कार्यक्रमात रत्नागिरी पोलीस दलाने तंत्रज्ञानाचा प्रभावी वापर आणि प्रशासकीय कामात पारदर्शकता आणत उत्कृष्ट कामगिरी नोंदवली. या कामगिरीमुळे राज्याच्या क्रमवारीत रत्नागिरीने पाचव्या स्थानावर झेप घेतली आहे. या यशाचे मुख्य शिल्पकार म्हणून पोलीस अधीक्षक श्री. नितीन बगाटे यांचा रत्नागिरी जिल्हा पोलीस दलाच्या वतीने मा. अपर पोलीस अधीक्षक श्री. बी. बी. महामुनी आणि उपस्थित सर्व वरिष्ठ पोलीस अधिकारी यांनी पुष्पगुच्छ देऊन विशेष सत्कार केला.
यावेळी बोलताना पोलीस अधीक्षकांनी हे यश केवळ एका व्यक्तीचे नसून संपूर्ण जिल्हा पोलीस दलातील प्रत्येक अधिकारी आणि अंमलदाराने घेतलेल्या कष्टाचे फळ असल्याचे नमूद केले. तंत्रज्ञानाच्या या युगात पोलीस दलाने अधिक लोकाभिमुख आणि पारदर्शक होण्यासाठी ई-गव्हर्नन्सचा वापर वाढवणे काळाची गरज असल्याचेही त्यांनी यावेळी सांगितले. या गौरव सोहळ्यामुळे पोलीस दलातील कर्मचाऱ्यांमध्ये उत्साहाचे वातावरण निर्माण झाले असून, आगामी काळात अधिक जोमाने काम करण्याची प्रेरणा सर्वांना मिळाली आहे. या बैठकीला जिल्ह्यातील सर्व उपविभागीय पोलीस अधिकारी, पोलीस निरीक्षक आणि विविध शाखांचे प्रभारी अधिकारी मोठ्या संख्येने उपस्थित होते.
Comments
Post a Comment