हेल्मेट केवळ डोक्यावरचा भार नाही, तर कुटुंबाचा आधार
रायगड पोलीसांचे भावनिक आवाहन
रायगड, दि. १ (विशेष प्रतिनिधी) :- रस्ते अपघातांचे वाढते प्रमाण आणि त्यात होणाऱ्या गंभीर दुखापती टाळण्यासाठी रायगड पोलीस दलाने आता सोशल मीडियाच्या माध्यमातून एक विशेष जनजागृती मोहीम हाती घेतली आहे. अलिकडेच रायगड पोलीसांनी आपल्या अधिकृत फेसबुक पेजवरून एक अत्यंत हृदयस्पर्शी पोस्ट शेअर केली असून, त्यामध्ये दुचाकीस्वारांना हेल्मेटचे महत्त्व केवळ तांत्रिक स्वरूपात न सांगता ते त्यांच्या कुटुंबाच्या सुरक्षेशी जोडले आहे. दुचाकी चालविताना तुम्ही परिधान केलेले हेल्मेट हे केवळ एक संरक्षक कवच नसून, ते तुमच्या संपूर्ण कुटुंबाच्या भविष्याची सुरक्षा कवच आहे, असा मोलाचा संदेश या पोस्टच्या माध्यमातून देण्यात आला आहे.
अनेकदा दुचाकीस्वार पोलीसांच्या दंडाला घाबरून किंवा केवळ औपचारिकता म्हणून हेल्मेटचा वापर करतात, मात्र रायगड पोलीसांनी या मानसिकतेवर प्रहार केला आहे. पोलीसांनी स्पष्ट केले आहे की, हेल्मेट ही निव्वळ प्लास्टिक किंवा फायबरची वस्तू नाही, तर ती एका व्यक्तीचा जीव आणि त्या व्यक्तीवर अवलंबून असलेल्या त्याच्या मुलाबाळांचे, पत्नीचे आणि वृद्ध आई-वडिलांचे भविष्य सुरक्षित ठेवणारे साधन आहे. रस्त्यावरील छोटासा निष्काळजीपणा एखाद्या कुटुंबाचा आधार हिरावून घेऊ शकतो, हे विदारक सत्य मांडत पोलीसांनी नागरिकांना नियम पाळण्याचे आवाहन केले आहे.
रायगड जिल्ह्यातील वाढती वाहतूक आणि महामार्गावरील अपघातांची तीव्रता पाहता, हेल्मेट न वापरणाऱ्यांविरुद्ध केवळ दंडात्मक कारवाई करून उपयोग होणार नाही, तर लोकांच्या विचारांत बदल होणे आवश्यक असल्याचे पोलीसांचे मत आहे. ही फेसबुक पोस्ट सध्या सोशल मीडियावर मोठ्या प्रमाणात व्हायरल होत असून, नेटकऱ्यांकडून पोलिसांच्या या संवेदनशील दृष्टिकोनाचे स्वागत केले जात आहे. 'तुमची सुरक्षा हीच तुमच्या कुटुंबाची खुशी' हा संदेश घराघरात पोहोचावा आणि प्रत्येक दुचाकीस्वाराने हेल्मेटला आपल्या प्रवासाचा अविभाज्य भाग बनवावे, हीच या मोहिमेमागची मुख्य भूमिका आहे. या उपक्रमामुळे जिल्ह्यातील दुचाकीस्वारांमध्ये सुरक्षिततेची भावना निर्माण होऊन अपघातातील मृत्यूदर कमी होईल, अशी आशा रायगड पोलीस प्रशासनाने व्यक्त केली आहे.
Comments
Post a Comment