खालापूर तालुक्यात जातीवाचक शिवीगाळ करत आदिवासी तरुणाला मारहाण
चौक बाजारपेठेतील घटना
खोपोली, दि. ९ (प्रतिनिधी) :- खालापूर पोलीस ठाण्याच्या हद्दीतील चौक बाजारपेठ परिसरात एका आदिवासी तरुणाला जातीवाचक शिवीगाळ करून भरबाजारात मारहाण केल्याची संतापजनक घटना समोर आली आहे. दुचाकी उभी करण्याच्या कारणावरून झालेल्या या वादात आरोपीने फिर्यादीला केवळ शारीरिक इजाच केली नाही, तर त्यांच्या जातीचा उल्लेख करून त्यांचा सार्वजनिक रित्या अपमान केला. याप्रकरणी खालापूर पोलिसांनी गुन्हा दाखल केला असून परिसरात या घटनेची मोठी चर्चा सुरू आहे.
मिळालेल्या माहितीनुसार, इसांबेवाडी येथील रहिवासी असलेले फिर्यादी हे आपल्या लहान मुलासह घरगुती सामान खरेदी करण्यासाठी चौक बाजारपेठेत आले होते. त्यांनी आपली मोटारसायकल (क्रमांक एम एच ४६ ए क्यू ९३४१) बाजारपेठेतील बिकानेर स्वीटमार्टच्या शेजारी असलेल्या एका मोकळ्या जागेत उभी केली. ही जागा सार्वजनिक आणि मोकळी असूनही, तिथे मासे विक्री करणाऱ्या एका स्थानिक आरोपीला हे सहन झाले नाही.
गाडी उभी केल्याचा राग मनात धरून आरोपीने फिर्यादीला हटकले आणि अत्यंत उद्धट भाषेत विचारणा करण्यास सुरुवात केली. "काय रे, ही गाडी तुझी आहे का? गाडी कुठे लावायची तुला समजत नाही का?" असे ओरडत त्याने फिर्यादीच्या जातीवर भाष्य करण्यास सुरुवात केली. आरोपीने भरबाजारात लोकांसमोर "तुम्ही आदिवासी कधी सुधारणार नाही" असे जातीवाचक शब्द वापरून फिर्यादीचा अपमान केला. जेव्हा फिर्यादीने शांतपणे उत्तर देत "मी मोकळ्या जागेत गाडी उभी केली आहे, तुला काय अडचण आहे?" अशी विचारणा केली, तेव्हा आरोपीचा राग अनावर झाला. त्याने फिर्यादीला शिवीगाळ करण्यास सुरुवात केली आणि "पुन्हा येथे गाडी लाव, मग तुला तुझी जात दाखवतो" अशी गंभीर धमकी देऊन त्यांना हाताबुक्यांनी मारहाण करण्यास सुरुवात केली.
भरबाजारात झालेल्या या हल्ल्यामुळे फिर्यादी अत्यंत घाबरले आणि स्वतःचा बचाव करण्यासाठी बाजारपेठेतील एका दुकानात शिरले. मात्र, आरोपीचा राग तिथेच शांत झाला नाही; त्याने फिर्यादीचा पाठलाग केला आणि दुकानात घुसून त्यांना पुन्हा मारहाण केली. या घटनेमुळे बाजारपेठेत काही काळ भीतीचे वातावरण निर्माण झाले होते.
याप्रकरणी पीडित तरुणाने तात्काळ खालापूर पोलीस ठाणे गाठून तक्रार दाखल केली. पोलिसांनी घटनेचे गांभीर्य ओळखून आरोपीविरुद्ध भारतीय न्याय संहिता २०२३ च्या कलम ११५(२), ३५१(२), ३५२ तसेच अनुसूचित जाती आणि अनुसूचित जमाती (अत्याचार प्रतिबंधक) कायदा १९८९ (सुधारणा अधिनियम २०१५) च्या कलम ३(१)(आर), ३(१)(एस), ३(२)(व्हीए) अन्वये गुन्हा रजिस्टर क्रमांक १२७/२०२६ नुसार दाखल केला आहे. या प्रकरणाचा अधिक तपास खालापूर विभागाचे उपविभागीय पोलीस अधिकारी श्री. विशाल नेहुल हे स्वतः करीत असून, आरोपीवर कडक कायदेशीर कारवाई करण्याचे संकेत पोलिसांनी दिले आहेत.
Comments
Post a Comment