राज्य शासनाचे पत्रकारिता पुरस्कार
प्रवेशिका सादर करण्यास ३१ मार्चपर्यंत मुदतवाढ
मुंबई, दि. २० (प्रतिनिधी) :- महाराष्ट्र शासनाच्या माहिती व जनसंपर्क महासंचालनालयामार्फत दरवर्षी विविध श्रेणींमध्ये दिल्या जाणाऱ्या राज्यस्तरीय पत्रकारिता पुरस्कारांसाठी आता प्रवेशिका सादर करण्यास मुदतवाढ देण्यात आली आहे. उत्कृष्ट पत्रकारिता, विशेष लेख, दूरचित्रवाणीवरील उत्कृष्ट वृत्तकथा, उत्कृष्ट छायाचित्रकार तसेच समाज माध्यम आणि स्वच्छता अभियानाबाबतच्या जनजागृतीपर लेखनासाठी या स्पर्धांचे आयोजन करण्यात आले आहे. यापूर्वी प्रवेशिका सादर करण्याची अंतिम तारीख १५ मार्च २०२६ अशी निश्चित करण्यात आली होती, परंतु आता ही मुदत वाढवून ३१ मार्च २०२६ पर्यंत करण्यात आली आहे, ज्यामुळे जास्तीत जास्त पत्रकारांना आणि लेखकांना या स्पर्धेत सहभागी होण्याची संधी मिळणार आहे.
या पुरस्कार स्पर्धेसाठी १ जानेवारी २०२५ ते ३१ डिसेंबर २०२५ या कालावधीत प्रसिद्ध झालेले विशेष लेख, छायाचित्रे किंवा दूरचित्रवाणीवरील वृत्तकथा ग्राह्य धरल्या जाणार आहेत. राज्यातील विविध भागांतील इच्छुक स्पर्धकांनी त्यांच्या संबंधित जिल्हा माहिती कार्यालयाकडून विहित नमुन्यातील अर्ज प्राप्त करून घ्यावयाचे आहेत. तसेच मुंबई शहर व मुंबई उपनगर जिल्ह्यातील स्पर्धकांनी माहिती व जनसंपर्क महासंचालनालय, तळमजला, हुतात्मा राजगुरु चौक, मादाम कामा मार्ग, मंत्रालय, मुंबई-३२ येथून आपले अर्ज मिळवावेत. याशिवाय स्पर्धकांच्या सोयीसाठी अर्जाचे नमुने आणि अधिकृत नियमावली शासनाच्या dgipr.maharashtra.gov.in या संकेतस्थळावरही उपलब्ध करून देण्यात आली आहे. पात्र उमेदवारांनी वाढीव मुदतीचा लाभ घेऊन आपले अर्ज वेळेत सादर करावेत असे आवाहन प्रशासनाकडून करण्यात आले आहे.
Comments
Post a Comment